Mumbai, Risaw:
Katkum ka jingïohlum khubor la ong ba ka daw jong ka jingleit pyndem wait jong u Mallojula Venugopal Rao, ba la tip ruh da ka kyrteng kum u Sonu bad kum u Bhupati — uba dei u dkhot jong ka Politburo jong ka kynhun Communist of India (Maoist) bad uwei na ki nongïalam ba pawnam jong ka kynhun Naxal, ka long hadien ka jingkyrpad jong u Myntri ka tnat ki kam pohiing jong ka sorkar pdeng u Amit Shah.
U Shah u la buh ka jingkyrpad ha u bnai Ïaïong ïa baroh ki Maoist kiba ïarap ïa ka kynhun bad kiba ju leh ïa ki kam thombor ha kaba kin iehnoh ïa kine ki kam beaiñ bad ban pynïasoh bad ka kynhun paidbah bad sha ka jingim kaba bha. U la buh wat ïa ka por ban pynkut noh ïa ka jinglehdonbor jong ki Maoist ha ka ri.
“Nga kyrpad ïa ki Naxal kiba dang rieh ban pyndem kloi katba lah bad ban ïasoh bad ka lynti kaba bha da kaba shim ïa ka polisi aiti noh jong ka sorkar u Modi. Ngi la kut jingmut ban pyllait ïa ka ri na ka jingshah pynjot jong ki kam pyntriem jong ki Naxal shwa ka 31 tarik u Lber 2026,” la ong u Shah.
U Bhupati u la leit pyndem ha ka miet jong ka lah sngi U Blei, ha kaba u la ïalam ryngkat bad u ïa 60 ngut kiwei pat ki dkhot, kaba la pyni ïa ka jingduhbor kaba khraw ïa ka seng.
U Venugopal ba la tip ruh da ka kyrteng kum u Bhupati bad kum u Sonu, ha ryngkat ki dkhot ka seng, kiba kynthup ïa uwei u dkhot jong ka Central Committee bad 10 ngut ki dkhot jong ka Divisional Committee, ki la pyndem hakhmat ki pulit ha Gadchiroli distrik jong ka Maharashtra, ong ki tyllong khubor.
La shim ba u Sonu u dei uwei na ki riewshemphang ba donbor bha ha ka kynhun Maoist bad u la khmih slem ïa ki kam jong ki kynhun shipai ha ka seng ha ki bynta jong ka khappud Maharashtra-Chhattisgarh, ong ki lad phah khubor. U la shah thong da T.10 klur na ki jylla bapher bapher.
Katkum ka khubor ba la ïohlum, la ong ba u Bhupathi um shym la long tang u khliehduh jong ka seng ha ka liang ka jingmut jingpyrkhat hynrei u dei ruh u riew shemphang ha ka liang ka jingïadei jong ka bad u ksai uba pynïasoh ïa ka bad ka pyrthei shabar jong ki khlaw ka Chhattisgarh .
“U Sonu u ju don ka jingïadei bad ka pyrthei shabar. U ju long u nongpynïasoh bad ki nongkyrshan jong ki Maoist bad ki seng ba hakhmat eh. Da ka jingmih noh jong u, ka paw shai ba ka kynhun Maoist ka la mad ïa ka jingshah pynphaidien,” la ong uwei u heh jong ka kynhun syntiat, la ïathuh ka tyllong khubor.
Katkum ka jingong ki heh sorkar, la ong ba u Sonu u la pynpaw ïa ka jingkwah ban aiti noh ha kaba sdang jong une u snem. Ka jingïapher jingmut kaba nang jur hapdeng u Sonu bad ki nongïalam ba hakhliehduh jong ka kynhun Naxal ha kine ki bnai ba la dep, ka la wanrah ïa ka jingïakynad hapoh ka seng, kaba la ngeit ba ka la long ka daw jong ka jingmih noh jong u.
U Sonu u la kynnoh ba ka jingïaleh da ki tiar ka la pulom bad u la kyrpad ban pynkylla sha ka jingsuk bad jingïakren, da kaba kdew ba ka jingkyrshan paidbah ka la nang duna bad ka jingduh noh da ki spah ngut ki dkhot. U la sngewsih ruh ïa ka jingduh noh jong ki katto katne ngut ki paralok ha ka jingïaleh bad ki pulit.
Bun ki dkhot jong ka kynhun ki la kyrshan ïa ka jingai jingmut jong u bad ki la mynjur ïa ka rai jong u. Hynrei ka jingïeng jong u ka la ïakynduh ïa ka jingpyrshah na kiwei pat ki heh nongïalam kiba la rai ban bteng ïa ka jingïakhun hapoh uwei pat u nongïalam, la ong ki tyllong khubor.
Ha kine ki bnai ba la dep, ka Gadchiroli distrik ka la sakhi ïa ka jingwan tuid stet jong ki Naxal kiba la pyndem wait hakhmat ki pulit.
Ha kaba sdang jong une u snem, ka kurim jong u Bhupathi, ka Tarakka ruh ka la aiti noh ïalade. Ka la long ka dkhot jong ka kynhun bakyrpang jong ka thaiñ jong ka Dandkaranya jong ka seng ba la shah ñiew beaiñ.
