Bihar, Risaw:
Ka seng Aam Aadmi Party (AAP) ka la pyllait paidbah ïa ka thup kyrteng kaba ar kaba don 48 ngut ki kyrtong ban ïakhun ïa ka ilekshon sha ka ïingdorbar thawaiñ jong ka Bihar ka ban sa wan.
Katkum ka thup kyrteng kaba la pyllait paidbah ha ka sngi Ba-ar, la pyni ba u Prem Prapt Singh u la shah pynïakhun na Chapra, u Rajendra Prasad Singh na Lalganj, u Aditya Lal na Purnia bad u Inderjeet Jyotikar na Hathua.
Ha kajuh ka por, ka Bharatiya Janata Party (BJP) ka la pynbna ïa ka thup kyrteng kaba nyngkong jong ka kaba don 71 ngut ki kyrtong na ka bynta kane ka ilekshon jylla kaba ïakhaid bha. U Samrat Choudhary bad u Vijay Sinha, ki dei kiba la shah jied na Tarapur bad Lakhisarai konstitwensi. Ki Myntri Rangbah barim ka jylla ka Renu Devi bad u Tarkishore Prasad kin ïakhun na Bettiah bad Katihar.
Ka BJP, ka la pynïeng ruh ïa u Myntri barim jong ka sorkar pdeng, u Ramkripal Yadav, na Danapur, katba u Lamphang ka sorkar pdeng, u Nand Kishore Yadav, u la shah kyntait ban ïoh tiket na Patna Sahib, ha kaba u Ratnesh Kushwaha, u la shah jied kum u kyrtong jong ka seng na katei ka shuki. Ka seng ka la bujli ruh ïa u MLA ba la slem jong ka Kumrahar u Arun Kumar Sinha da u Sanjay Gupta.
Kane ka thup kyrteng ka kynthup ïa ki hynñiew ngut ki kyrtong kynthei, ka Renu Devi (Bettiah), Gayatri Devi (Parihar), Devanti Yadav (Narpatganj), Sweety Singh (Kishanganj), Nisha Singh (Pranpur), Kavita Devi (Korha – SC), bad u Rama Nishad (Aurai).
Ka BJP Central Election Committee, kaba la pynïaid da u JP Nadda, ka la pynkut bad ai ïa ka rai ba khatduh halor ka thup kyrteng, ha ka jingïalang ha ka 12 tarik u Risaw, ha kaba u Myntri Rangbahduh ka ri, u Narendra Modi, u Rajnath Singh, Myntri ka tnat ïada ri bad u Amit Shah, u Myntri ka tnat ki kam pohïing ki la don bynta lang.
Ka Bihar kan pynlong ïa ka jingthep vote ha ki ar bynta ha ka 6 tarik, Naiwieng bad 11 tarik Naiwieng bad ïa ki nongjop yn sa pynbna ha ka 14 tarik, Naiwieng. Ka tarik ba khatduh ban thep kyrteng na ka bynta ka bynta ba nyngkong ka long ha ka 17 tarik u Risaw.
