Patna, Risaw:
Ka seng Bharatiya Janata Party (BJP) ha ka sngi Ba-ar ka la pyllait paidbah ïa ka thup kyrteng kaba nyngkong eh jong ki 71 ngut ki kyrtong na ka bynta ka ilekshon sha ka ïingdorbar thawaiñ jong ka jylla Bihar ban wan, kaba la buh ban long ha ka 6 bad 11 tarik u Naiwieng. Kane ka thup ka dei kaba la pyllait da ka Central Election Committee jong ka seng.
Ka BJP ka la long kaba nyngkong eh napdeng ki kynhun NDA ban pynbna ïa ki kyrtong jong ka na ka bynta kane ka ilekshon kaba ar bynta. Katei ka thup kyrteng, ka kynthup ïa ki katto katne ngut ki nongïalam ba pawnam, ba kynthup ïa baroh arngut ki Symbud Myntri Rangbah ka Jylla, u Samrat Chaudhary bad u Vijay Kumar Sinha.
Katba u Chaudhary u la shah pynïeng na Tarapur ha Munger, u Sinha un ïakhun na Lakhisarai Assembly konstitwensi. U Rajiv Kumar Singh na ka JD(U) u la jop ïa ka shuki Tarapur ha ka ilekshon shiteng samoi kaba la long ha u snem 2021.
Na ki 71 ngut ki kyrtong, khyndai ngut ki dei ki kynthei. Ka kyrteng jong u Lamphang ka ïingdorbar thawaiñ ka Bihar, u Nand Kishore Yadav, kam shym la paw ha katei ka thup. Ha ka jaka jong u Yadav la bujli da u kyrtong bathymmai u Ratnesh Kushwaha na Patna Saheb.
U Myntri ka tnat ka koit ka khiah u Mangal Pandey uba dei u dkhot jong ka Legislative Council (MLC) ruh u la shah pynmih madan. Une un sa ïakhun ïa ka ilekshon na Siwan Assembly konstitwensi, kaba dei ka distrik trai jong u.
U Ram Kripal Yadav, uba dei u MP barim ka Patliputra, u la shah pynïeng na Danapur Assembly konstitwensi. U Ram Kripal, uba dei ruh u Myntri barim jong ka sorkar pdeng, u la shah rem ha ka khun heh jong u heh nongïalam ka seng RJD, u Lalu Prasad, ka Misa Bharti, ha ka ilekshon Lok Sabha ha u snem 2024.
Ha kane ka thup kyrteng la kynthup ruh ïa u Myntri ka tnat Animal Husbandry and Fisheries ka Renu Devi na Bettiah, ka Gayatri Devi na Parihar, u Neeraj Kumar Singh Bablu na Chhatapur, bad u Prem Kumar na Gaya.
Ka BJP ka la bat ïa ka Hisua konstitwensi, da kaba pynïeng thymmai ïa u Anil Kumar kum u kyrtong jong ka. U Symbud Myntri Rangbah barim u Tarkishore Prasad un ïakhun na Katihar, katba u Alok Ranjan Jha un ïakhun na Saharsa.
Ha ka step jong kane ka sngi, u President ka BJP ka Bihar, u Dilip Jaiswal, u la ong ba ïa ka thup kyrteng jong ki kyrtong yn sa pynmih ha ka janmiet jong ka sngi Ba-ar.
Hynrei na ka liang ka JD(U) ka la pynpaw ïa ka jingbym hun halor ki katto katne ki konstitwensi kiba la ai sha ka BJP bad sha ka Lok Janshakti Party (Ram Vilas) jong u Myntri ka sorkar pdeng u Chirag Paswan.
Katkum ka jingïamynjur ha ka jingïabhah konstitwensi, ka BJP bad ka JD(U) kin ïakhun mar 101 tylli ki konstitwensi. Ka LJP (RV) jong u Chirag Paswan ka la ïoh 29 tylli ki konstitwensi, katba ka HAM jong u Jitan Ram Manjhi bad ka RLM jong u Upendra Kushwaha kin ïakhun mar 6 tylli ki konstitwensi.
Ka ilekshon ban jied ïa ki 243 ngut ki dkhot jong ka Assembly ha Bihar kan long ha ka 6 tarik, Naiwieng bad ka 11 tarik, Naiwieng, ka jingñiew vote kan long ha ka 14 tarik, Naiwieng.
