Patna, Risaw:
Hashwa ka ilekshon sha ka ïingdorbar thawaiñ jong ka Bihar, ka Congress ka la pynbna ban ïakhun ha ki 61 tylli ki konstitwensi kum shi bynta jong ka kynhun Mahagathbandhan, la ïathuh ki tyllong khubor jong ka seng ha ka sngi U Blei.
Kumba la ïathuh, la ong ba ka jingïakren ban ïasam shuki hapdeng ka Congress bad ka Rashtriya Janata Dal (RJD), ka dang don ha ka bynta ba khatduh, ha kaba tang katto katne tylli ki konstitwensi, ar ne lai tylli, ki dang don ha ka jingïakren.
La khmih lynti ïa ka jingpynbna kaba pura lashai ka sngi.
Katkum ki tyllong khubor ba la ïohlum, la ong ba ka seng RJD ha kaba nyngkong ka thmu ban pynïeng kyrtong ha ki 144 tylli ki konstitwensi, ka la mynjur ban pynïeng kyrtong ha ki 135 tylli ki konstitwensi.
Ka Congress kaba la khmih lynti ban ïoh 70 tylli, mynta kan sa pynbeit noh ïa ki 61 tylli hapoh katei ka jingïatehlok.
Ha kawei pat ka liang, baroh ki khmat ki peit beit sha Raghopur, namar ba u nongïalam ka RJD, u Tejashwi Yadav, u dei ban thep kyrteng na katei ka konstitwensi kaba heh bha ha ka 15 tarik, Risaw.
Ka Raghopur ka kit ïa ka jingkit kaba khia ha ka saiñ pyrthei bad ka jingsngew na ka bynta ka ïing ka sem ki Yadav.
Kane ka shuki ka la long kaba skhem jong ka RJD, kaba mynshwa la mihkhmat da u heh nongïalam jong ka seng u Lalu Prasad Yadav bad ka kurim jong u, kaba long ka Myntri Rangbah barim ka Rabri Devi.
U Tejashwi Yadav, u la bat ïa kane ka shuki, naduh u snem 2015 bad u dang pan ïa ka samoi treikam kaba ha ka sien kaba lai lynter.
Haba bynrap ïa ka drama, u nongseng jong ka Jan Suraaj Party bad u riewstad ha ka kam saiñ hima sima u Prashant Kishor dang shen u la ai dak ïa ka jinglah ban ïakhun na Raghopur.
Ka jingrung jong u kan pynlong ïa ka jingïakhun kaba kham jur shuh shuh, kaba lah ban buh ïa ka jingïakhun pyrshah bad u Tejashwi ha kawei na ki jingïakhun ilekshon ba la khmih bniah bad peit thuh bha ha Bihar.
