Bhubaneswar, Risaw:
Kum shi bynta ban ïakhun tyngeh halor ka jingshalan ïa ki dawai kiba long beaiñ, ki pulit jong ka Sambalpur ha ka sngi Ba-ar ki la ïoh ban kem ïa ka kynhun runar kaba donkti ha kaba khaïi tuh ïa ki dawai jyrhoh kaba don ïa ka Codeine. Kane ka jingkhynra ka la pynlong ban ïohkem ïa 20 ngut ki briew bad kurup 5,100 tylli ki bilor jong ka dawai jyrhoh ba la shah khang na kawei ka kali Pickup Van ha ka jaka kaba hap hapoh ka jingkhmih jong ki pulit ka Baraipali.
U SP u Mukesh Bhamoo u la ong ba ha ka por kumba 2.30 baje nohphai sngi, jong ka lah sngi U Blei, ki pulit ka Bareipali ki la ïoh jingtip halor ka jingkit be-aiñ ïa ki dawai jyrhoh na Cuttack. La ïathuh ba ïa katei ka mar la pynkynriah da ka Pickup Van ban pynpoi ha Mesinkata Chowk.
Da kaba pynstet halor ka jingtreikam, ka kynhun pulit ka la leit ban khynra ïa katei ka jaka bad kem ïa san ngut ki briew ha ka por ba la ïathuh ba ki dang pynkhreh ban ïateh kular.
U la ïathuh ba ki pulit ki la bat ïa kane ka kali ryngkat bad 17 tylli ki pla plastik ba la shah khang ban pyndonkam kiba don baroh 5,100 tylli ki bilor dawai jyrhoh kaba shongdor kumba T. 15 lak, san tylli ki Mobile Phone, bad ka pisa kaba T. 40,920. Ha ka jingtohkit, kine kiba shah kynnoh ki la pynpaw ba ki thmu ban sam ïa kine ki dawai ha ki jaka slum bapher bapher jong ka Sambalpur shwa ka jinglehkmen Diwali. Hadien kata, la kem ïa ki paralok bad ki nongïarap jong ki.
U Bhamoo u la ong ba ki pulit ki suba jur ba ka tynrai ba kongsan eh jong katei ka mar ka lah ban dei na Kolkata lane na Raipur. Haduh mynta ki la don 20 ngut ki briew kiba la shah kem ha kaba ïadei bad kane. “Ka jingïoh kurup ka la pynpaw pyrthei ïa ka kynhun kaba kham heh jong ki nongkhaïi drok kiba treikam hapoh bad sawdong jong ka Sambalpur. Ki kynhun jong ngi ki dang wad ïa ka lynti jong ka pisa bad ki dang ithuh ïa kiwei pat ki dkhot kiba ïadei bad ka jingpynpoi drok hapdeng ki distrik,” u la bynrap.
