New Delhi, Risaw:
Ki pulit ka Angul ha ka sngi Ba-ar ki la kem ïa arngut ki trai shnong Rajasthan halor ka jingkynnoh ba ki la thok pisa ïa kawei ka kynthei na Talcher kaba la kot sha ka T.2.49 lak.
Kitei kiba la shah kynnoh, ki dei kiba la tip kyrteng kum u Gourav Kumar (22) bad u Bansa Kumar (21) ki dei kiba na Alwar distrik jong ka Rajasthan. Ki pulit ki la kurup ïa ka pisa kaba T.20,000, ka laptop, katto katne ki Sim Card, bad kiwei kiwei ki tiar kiba lah ban leh ïa ki kam beaiñ.
Ki pulit ki la ïathuh ba kane ka lanot ka dei kaba la tip kyrteng kum ka Ranjan Vaishya kaba dei na ka thaiñ Gurudwar ha Talcher bad ka dei kaba pynïaid ïa ka kam khaïi ïa ki shampoo bad ki dawai sait khmat. Ban pynïar ïa ka kam jong ka, ka la wad Online ïa ki nongpynmih bad ki lad ban shalan ïa ki mar. Kiba la shah kynnoh ki la jubab ïa ka jingkylli jong ka bad ki la ïakren bad ka halor ka jingphah pisa na ka bynta ban lah ban shalan ïa ki mar, bad ban phah sha ka da ka Bank Account Number.
Hadien kata kane ka briew ka la thep pisa T.2.49 lak ha ki bynta bynta hapdeng ka 4 tarik, Ïaïong haduh ka 25 tarik u Jymmang, haba kam shym la ïoh jubab hadien ba la dep siew, ka la ujor ejahar ha thanat Angul Cyber ha ka 5 tarik u Jylliew.
Hadien ka jingujor, u SP ka Angul u Rahul Jain u la thaw ïa ka kynhun ba kyrpang kaba la ïalam da ka IIC ka Bikrampur ka Lalita Pradhan. Da kaba wad ïa ka rukom leit jong ka pisa, ka kynhun ka la leit sha Rajasthan, ha kaba ki la lap bad kem ïa ki arngut ki runar. Ha ka jingtohkit, la ïathuh ba kiba la shah kynnoh ki la phla ïa katei ka kam runar.
Ïa kine kiba shah kynnoh la leit ïalam hakhmat ka ïingbishar bad la set ïa ki ha phatok. U SP Jain u la ong ba ka jingtohkit kaba bniah ka dang ïaid shakhmat ban lap ïa ka jingdonkti jong ki ha kiwei pat ki kam thok lyngba ka Cyber.
