Patna, Risaw:
Naba ka sngi thep kyrteng ka la jan kut, jong ka bynta ba nyngkong jong ka ilekshon sha ka ïingdorbar thawaiñ jong ka Bihar, ki kam saiñ pyrthei ki la nang jur ha katei ka jylla.
Ka Congress, kaba dei ka paralok ba kongsan jong ka kynhun liang pyrshah ka INDIA, ka la sdang ban ai ïa ki shap jong ka seng sha ki kyrtong jong ka wat haba ym pat lah ban pynbna paidbah ïa ka jingïateh kular ban ïasam shuki.
Ka Congress ka la pynmih ïa ka thup jong ki 17 ngut ki kyrtong, da kaba buh ïa ka jingpynbna ha ka rynsan X ba thikna jong ka wat haba ki jingpynbeit ban ïasam shuki hapoh ka kynhun INDIA ki dang sah khlem lah ban pynbeit.
Ka seng ka la pynïeng ïa u Anand Shanker Singh na Aurangabad, ka Pratima Das na Rajapakar, u Shiv Prakash Garib Das na Bachhawara bad u Kaushalendra Kumar (Chhote Mukhiya) na Nalanda.
Nalor kata, u Shashi Bhushan Rai u la shah pynïeng na Govindganj, u Anil Kumar na Bikram, bad u B K Ravi na Rosera.
Ki tyllong khubor ki ïathuh ba yn sa pynbna shuh shuh ïa ki kyrteng hadien ba la ïamir jingmut bad ki nongïalam jong ka kynhun INDIA.
Kumjuh ruh u Om Prakash Garg un ïakhun ilekshon na Gopalganj, u Jitendra Singh na Amarpur, ka Amita Bhushan na Begusarai, u Lalan Kumar na Sultanganj, u Rajesh Kumar na Kutumba, u Shashi Sekhar na Warsaliganj, u Trishuldhari Singh na Barbigha, u Vijendra Choudhary na Barbigha, u Vijendra Choudhary na Muzaffarpur.
Ka Congress Central Election Committee (CCEC) ka la mynjur ïa ki kyrtong na ka bynta 43 tylli ki konstitwensi. La ïathuh ba katei ka Sub-Committee, kaba la khlieh da u Ajay Makan, ka la pynbna ïa ki kyrteng jong kiwei pat ki 8 ngut ki kyrtong, ha ka sngi Balang.
Ha ka kynhun NDA kaba synshar, ka Bharatiya Janata Party (BJP) ka la pyllait paidbah ïa ki kyrteng jong baroh 101 ngut ki kyrtong.
Ïa ka thup kaba lai kaba don 18 ngut ki kyrtong la pynmih ha ka por janmiet jong ka sngi Balang.
Katkum ka thup, ka Bina Devi kan ïa khun na Kochadhaman, ka Sangita Kumari na Mohania, u Sanjay Pandey na Narkatiaganj, u Satish Kumar Yadav na Raghopur bad u Bharat Bind na Bhabua.
U Murari Paswan un wan ban ïakhun na Pirpaint bad u Ashok Kumar Singh na Ramgarh.
Kham hashwa ka seng ka la pynmih ïa ka thup ba ar jong ki 12 ngut ki kyrtong, ba kynthup ïa ka nongrwai tynrai ka Maithili Thakur na Alinagar bad u IPS Officer barim u Anand Mishra na Buxar. Da kane ka BJP ka la pynbna ïa ki kyrtong na ka bynta baroh ki 101 tylli ki konstitwensi.
Ka paralok jong ka NDA–Ka Janata Dal (United) ka la pynmih ïa ka thup ba nyngkong jong ka kaba don 57 ngut ki kyrtong. Ki heh nongïalam kum u Umesh Kushwaha bad u Vijendra Prasad Yadav ki la dep ban thep kyrteng na Mahnar bad Supaul konstitwensi. La khmih lynti ba u Vijay Kumar Chaudhary un thep kyrteng na Sarairanjan ha ka sngi Palei.
Hapoh ka jingïateh ban ïasam shuki hapoh ka NDA, ka BJP bad ka JD(U) kin ïakhun mar 101 tylli ki konstitwensi, ka LJP(RV) 29 tylli, ka HAM bad ka RLM mar 6 tylli ki konstitwensi.
Ka ilekshon sha ka ïingdorbar thawaiñ jong ka Bihar kan long ha ki ar bynta ha ka 6 tarik bad 11 tarik u Naiwieng bad ka jingñiew ïa ki vote kan long ha ka 14 tarik u Naiwieng bad baroh ki nongthep vote ki long 7.42 klur ngut, kaba hiar na ka 7.89 klur ha u bnai Jylliew mynta u snem.
