Bhubaneswar, Risaw:
U nongïalam ka liang pyrshah ha Odisha Assembly bad u President ka BJD u Naveen Patnaik ha ka sngi Palei u la ong ba un bteng ban shakri ïa ka jylla bad ïa ki paidbah jong ka haduh kaba kut jong ka jingim jong u.
U Patnaik u la ong ïa kane haba u ïasoh bad ka ‘Jan Sampark Padyatra’ kaba dang ïaid shakhmat jong ka seng ha ka sngi kha ba 79 snem jong u.
Kane ka dei ka sien kaba nyngkong eh jong u Patnaik ban mih paidbah hadien jan shibnai ha kaba u la shah sumar ha ki hospital ha Mumbai bad ha Bhubaneswar. Hadien ba u la koit, u la shongthait kumba shibnai eiei ha Delhi bad u la leit phai biang sha ka jylla ha ka taïew ba la lah.
U Patnaik uba la jop san sien ïa ka shuki Myntri Rangbah ka Odisha, u la ïalam ïa ka jingïaid paidbah ha Ganga Nagar Palli, kaba hap hapoh ka bynta jong ka ïingdorbar Ekamra-Bhubaneswar bad u la ïaid katto katne sienjam kum shi bynta jong ka Jan Sampark padyatra jong ka BJD.
“Nga don beit bad phi (ki briew jong ka Odisha) bad ngan ïai long kumta. Ngan ïai bteng ban shakri ïa ka Mei Odisha haduh kaba kut jong ka jingim jong nga,” la ong u Patnaik ha ka jingïalang.
Haba sdang ïa ka jingkren lyngkot jong u da ka jingpyrta ‘Jai Jagannath’, u Patnaik u la ai khublei ïa baroh ki paidbah kiba la don ha katei ka jaka kiba la ïadon bynta lang ha kane ka Yatra kaba man la u snem jong ka BJD. “Ka BJP ka dei ka seng jong phi bad ka dei ka seng jong ki paidbah ka Odisha”, la ong u Patnaik uba la dap 79 snem ha ka 16 tarik u Risaw.
