Kolkata, Risaw:
Ka Myntri Rangbah jong ka West Bengal, ka Mamata Banerjee, ha ka sngi Palei, ka la ong ba kawei ka temple kaba heh ka ‘Mahakaal’ kan sa mih ha Siliguri, na ka bynta kane yn sa thaw ïa ka Trust.
Haba kren sha ki nongthoh khubor ha Darjeeling, ka la ong ba ïa kane ka temple yn tei ha syndah jong ka jaka pynlong jingïalang kaba la thmu ban pynlong ha Siliguri. Ka Mahakaal ka dei kawei pat ka kyrteng jong u Lord Shiva ha ki khanatang jong ki Hindu.
“Ka temple Mahakaal kaba heh kan sa mih hajan ka jaka pynlong jingïalang kaba la thmu ha Siliguri. Na ka bynta kane, donkam ban thaw ïa ka Trust”, ka la ong hadien ba ka la dep ban ai jingduwai ha ka temple Mahakaal ha Darjeeling. La ai burom ruh ïa ka Banerjee kaba la buh ïa ka temple Jagannath ha Digha.
Ka Myntri Rangbah ka jylla, ka don ha ka prokram pyntip paidbah ha North Bengal, kaba la mad jingeh bha namar ka jingjur jong u slap bad ka jingtwa khyndew ha kaba 32 ngut ki briew, ki la duh noh ïa la ka jong ka jingim.
Ka la ong ba ïa ka jaka ban tei ïa ka temple yn ai da ka sorkar jylla, katba ka jingtei ïa ka temple kan shim kumba katto katne por.
