Patna, Risaw:
Ka seng Congress, ha ka sngi Saitjaiñ, ka la pynmih ïa ka thup kyrteng kaba ar jong ka, na ka bynta ka ilekshon sha ka ïingdorbar thawaiñ jong ka Bihar, kaban sa wan, ha kaba ka la pyndap sa san tylli ki kyrteng sha ki 48 ngut ki kyrtong, kiba ka seng, ka la pynbna ha ka thup kyrteng kaba nyngkong jong ka.
Ha ka thup ba ar, ka Congress ka la pynbna ïa ki kyrtong ban ïakhun ïa ki kyrtong na Narkatiaganj, Kishanganj, Kasba, Purnia bad Gaya Town.Ka party ka la pynïeng ïa u Shaswat Kedar Pandey na Narkatiaganj bad u Qamrul Hoda na Kishanganj.
U Irfan Alam, u Jitender Yadav bad u Mohan Shrivasta kin ïakhun ïa ka ilekshon na ki konstitwensi kiba kynthup ïa ka Kasba, Purnia bad Gaya Town. Ka jingthep vote na ka bynta ka ïingdorbar thawaiñ jong ka Bihar kaba don 243 tylli ki Seat kan long ha ki ar bynta ha ka 6 tarik u Naiwieng bad ka 11 tarik u Naiwieng, ha kaba ka jingñiew vote kan long ha ka 14 tarik u Naiwieng.
Ka kynhun Mahagathbandhan, kaba kynthup ïa ka RJD bad ka Congress, kam shym la lah satia ban pynkut ïa ka jingïateh kular halor ki shuki na ka bynta ka bynta ba nyngkong jong ka ilekshon ha Bihar, namar ba ka jingïathep kyrteng ka la kut noh ha ka sngi Thohdieng. Ki nongthep vote jong ka Mahagathbandhan ki don bynta ha ka “jingïaleh para seng ïatreilang” ha ki katto katne ki konstitwensi.
Ka Jharkhand Mukti Morcha (JMM), kaba dei ka khlieh jong ka kynhun synrop ha Jharkhand bad kaba dei ruh na ka liangpyrshah INDIA bloc, ka la pynbna ha ka sngi Saitjaiñ ba kan ïakhun laitluid ha ka ilekshon ha Bihar ym kum shi bynta jong ka Mahagathbandhan.
U General Secretary bad nongaiktien jong ka JMM u Supriyo Bhattacharya u la pynbna ba ka seng kan ïakhun hi ïa ki 6 tylli ki konstitwensi.
Ka tarik ba khatduh ban thep kyrteng na ka bynta ka bynta kaba nyngkong ka long ha ka 17 tarik u Risaw bad kata na ka bynta ka bynta kaba ar kan long ha ka 20 tarik u Risaw kata mynta ka sngi.
Ka Congress, ha ka sngi Thohdieng, ka la pynbna ïa ki 48ngut ki kyrtong ban ïakhun ïa ka ilekshon sha ka ïingdorbar thawaiñ jong ka Bihar, ha ka thup kyrteng ba nyngkong jong ka.
Ka seng ka la jied ïa u heh jong ka Bihar unit u Rajesh Ram kum u kyrtong na ka Kutumba konstitwensi.
Ha ka thup ba nyngkong la kynthup ruh ïa u nongïalam ka CLP u Shakeel Ahmad Khan, uba la shah jied na Kadwa.
Ka Congress, ka la pynmih ïa ka thup kyrteng ba nyngkong eh jong ki kyrtong, shwa ban pynbna ïa ka jingpynbeit ïa kaba la pynkut, ha kaba ïadei bad ka jingïasam shuki bad ki seng ba la ïatreilang jong ka Mahagathbandhan ha Bihar, kaba kynthup ïa ka RJD.
Ka seng ka la pynïeng ïa u nongïalam jong ka Bihar Youth Congress u Prakash Garib Das na Bachhwada, u Jayesh Mangal Singh na Bagaha, u Amit Giri na Nautan bad u Abhishek Ranjan na Chanpatia.
