Bengaluru, Risaw:
Haba pynpaw ïa ka jingpyrshah jur ïa ka sorkar jylla, u Myntri ka sorkar pdeng uba dei khmih ïa ka tnat Heavy Industries and Steel u HD Kumaraswamy ha ka sngi Thohdieng u la ong ba ka la iehnoh ïa ki jingkular ba la ai sha ki paidbah.
Hadien ba u la duwai ha ka mandir Hasanamba hangne, u la ong ba ka sorkar ka ai jingmut ïa ka saiñ pyrthei ban ïa kaba weng ïa ki jingeh jong ki riew paidbah bad ki nongrep.
Ki Myntri ki pynmih ïa ki jingkren bym kwah bad kiba kyrkieh tang ban pynkylla ïa ka jingmut jingpyrkhat jong ki paidbah, u la ong. “U Myntri IT-BT (Priyank Kharge) u la thong ïa ka RSS na ka bynta ka jingmyntoi ha ka saiñ pyrthei bad ban pynkhlaiñ ïa ka vote bank ha ka jylla”, u la bynrap.
U Kumaraswamy u la ong ba u long uba kloi ban ïakren bad ka sorkar jylla halor ka jingkren jong u Myntri Rangbah ka jylla Siddaramaiah halor ka pisa ba la pyllait sha ki MLA ha ka por jong ka sorkar synrop ka BJP-JDS bad ha kane ka sorkar ba mynta.
U la ong ba ka sorkar jylla kam don hok ban kynnoh ïa ka sorkar pdeng namar ba bun ki tnad kim shym la lah ban pyllait ïa ka Matching Grant na ka bynta ki projek kiba kongsan. Ki klur tyngka ba la mang da ka sorkar pdeng la pynkylla sha ki prokram bapher bapher, u la kynnoh.
Ka Congress ka la kynnoh ba 40% ka Commission la siew da ki kontraktor ha ka por jong ka sorkar BJP barim, hynrei hapoh ka sorkar jong ka hi, ka jingsiew da ki kontraktor ka la kiew sha ka 60%, u la bynrap.
