Mumbai, Risaw:
Ka Shiv Sena (UBT) bad ka Maharashtra Navnirman Sena kin ïakhun lang ha Thane Civic Poll bad kin jop palat 75 tylli ki konstitwensi, ong u Sanjay Raut na ka seng ba la ïalam da u Uddhav Thackeray ha ka sngi Saitjaiñ.
Kane ka jingkren jong u ka la wan hapdeng ka bynta jong ki nongïalam ka BJP kiba kwah ba ka seng kan leit marwei ha Thane, kaba la tip ba ka dei ka kut jong u Symbud Myntri Rangbah ka Maharashtra, u Eknath Shinde bad ka Shiv Sena jong u.
“Ka Shiv Sena (UBT) bad ka MNS kin ïakhunlang bad kin jop ha Thane. Ka jingpyrta jong ngi ka long 75 paar (palat 75 konstitwensi),” la ong u Raut haba kren sha ki nongthoh khubor. Ka Thane Municipal Corporation ka don 131 tylli ki konstitwensi.
U Uddhav Thackeray bad u heh ka MNS u Raj Thackeray ki la ïajan ha kine ki saw bnai ba la dep kaba la pynmih ïa ka jingsawa jong ka jingïateh lok. Katba baroh arngut kim pat pynbna paidbah ïa katei ka jingïateh, hynrei la khmih lynti ba yn sa pynbna shwa ka jingthep vote ïa ki bor synshar shnong.
