Patna, Risaw:
Ka seng Rashtriya Janata Dal (RJD), ha ka lah sngi U Blei, ka la pynbna ïa ka thup kyrteng jong ki 143 ngut ki kyrtong, na ka bynta ka ilekshon sha ka ïingdorbar thawaiñ jong ka Bihar, katto katne kynta shwa ba ka jingthep kyrteng na ka bynta ka bynta kaba ar bad kaba khatduh, kan kut noh. Ïa ka ilekshon la buh ban long ha ka 6 tarik, Naiwieng bad ka 11 tarik u Naiwieng, bad ka jingñiew vote kan long ha ka 14 tarik u Naiwieng.
U Tejashwi Yadav, uba long u nongïalam ka RJD, u la shah pynïeng ban ïakhun na Raghopur Assembly konstitwensi kaba hap ha Vaishali District. Ka Raghopur ka kit ïa ka jingkit kaba khia ha ka saiñ pyrthei bad ka jingsngew na ka bynta ka ïing ka sem ki Yadav. Kane ka shuki ka la long ka bynta ba skhem jong ka RJD, kaba mynshwa la mihkhmat da u heh nongïalam ka seng u Lalu Prasad Yadav bad ka kurim jong u, kaba long ka Myntri Rangbah barim ka jylla ka Rabri Devi. U Tejashwi Yadav, u la bat ïa kane ka shuki, naduh u snem 2015 bad u dang pan ïa ka samoi treikam kaba lai lynter.
Na ki 143 ngut ki kyrtong, san ngut kin kut noh ha kaba ïakhun pyrshah ïa ki nongmihkhmat jong kiwei pat ki nongthep vote jong ka kynhun INDIA. Hynrei katei ka thup ka la buh jingeh ïa ki khubor ba la mih ba ka RJD kan ïakhun ïa ka shuki Kutumba, kaba la bat mynta da u President ka Congress jong ka jylla, u Rajesh Kumar Ram, kaba lah ban wanrah ïa ka jingïakhun kaba pura hapdeng kine ki ar tylli ki seng kiba ïatreilang.
Ka seng kan kut ruh ha kaba ïakhun pyrshah ïa ka Congress ha Vaishali, Lalganj bad Kahalgaon, bad pyrshah ïa ka Vikassheel Insan Party jong u Myntri barim ka jylla u Mukesh Sahni ha Tarapur bad ha Gaura Boram.
Kiba pawnam napdeng ki kyrtong ki long u Tejashwi Yadav (Raghopur), u Alok Mehta (Ujiyarpur), u Mukesh Raushan (Mahua) bad u Akhtarul Islam Shahin (Samastipur), kine baroh kin ïada ïa ka shuki ba dang bat jong ki.
U nongïarap ba shimet jong u president ka RJD, u Lalu Prasad, u Bhola Yadav, uba la jop ruh ïa ka shuki Bahadurpur ha u snem 2015, hynrei u la hiar noh hadien san snem haba katei ka seng ka la shah rem ha katei ka konstitwensi ha ka JD(U) jong u Myntri Rangbah ka Jylla, u Nitish Kumar, kan pyrshang ban knieh noh ïa kane ka konstitwensi na u Myntri u Madan Sahni.
U Lamphang barim u Awadh Bihari Chaudhary, uba la shah pynrem ha u dkhot ka seng JD(U) ha ka ilekshon Lok Sabha ha u snem ba la dep haba u ïakhun na Siwan, u la ïoh jingbit ban pyrshang bad ban bat biang ïa ka Assembly konstitwensi da kajuh ka kyrteng.
U Chandrashekhar, Myntri barim jong ka pule puthi, uba la paw ha ki khubor, na ka bynta ki jingmut ba ïaleh pyrshah jong u, halor ki jingthoh bakhuid jong ki Hindu, u la shah pynïeng ruh na ka konstitwensi jong u ha Madhepura.
Ka kynhun ba ai jingkyrshan ka “MY” (Muslim-Yadav) jong ka seng ka paw ba la buh ha ka jingmut ha kaba jied ïa ki kyrtong, wat la kiwei pat ki jaitbynriew kiba sahdien bad ki jaitbynriew kiba halor ruh la ai tiket.
Ka seng pyrshah ba kongsan ka lah ruh ban sngew sarong ba ka la pynïeng 21 ngut ki kynthei, kaba kham bun ban ïa ki nongïakhun pyrshah ba kongsan jong ka, ka JD(U) bad ka BJP.
Ka JD(U) bad ka BJP, ki ar tylli ki bynta ba kongsan jong ka NDA kaba synshar, ki ïakhun mar 101 tylli ki konstitwensi.
Bunsien la kynnoh da ki nongkren beiñ jong ka ba ka la wanrah ïa ka jingsynshar riewkhlaw katba ka dang don ha ka bor, ka RJD ka la kham jied ïa ka saiñ pyrthei bashisha ban ïa ka jingpynkylla dur.
U Osama Shahab uba la kylla long u riew saiñ pyrthei kum u Bogo Singh (Matihani) u don hi ha ka jingïakhun, katba u Osama Shahab u la ïoh ïa ka lad ban pynïaid shakhmat ïa ka pateng jong u kpa ba la khlad noh da kaba mih madan nyngkong na Raghunathpur, kaba hap hapoh ka Siwan Lok Sabha konstitwensi, ha kaba ki kmie ki kpa jong u ki dang sah kumba ki bym ju shah rem tad haduh ba un da shah weng noh hadien ka jingshah pynngat bad shah rai pynrem ha ki kam beaiñ.
Ka Veena Devi, ka MP barim, kaba dei ka kurim jong u Suraj Bhan Singh, uba la kylla long u nongleh kam sniew, kan ïakhun pyrshah ïa u Anant Singh, u nongïakhun pyrshah ba khraw jong u kurim jong ka, ha Mokama.
Namar ka kynrum kynram hapoh ka Mahagathbandhan, ka RJD kam shym la pynmih ïa ka thup kyrteng jong ki kyrtong jong ka haduh mynta. Hynrei wat shwa ban pynmih ïa ka thup kyrteng kaba thikna, ka seng ka la ai shap ïa baroh ki kyrtong jong ka.
Ha kajuh ka por, ka Congress ha ka lah sngi U Blei ka la pyllait shuh ïa ka thup kyrteng jong ki hynñiew ngut ki kyrtong na ka bynta ka ilekshon Assembly ha Bihar bad baroh ki kyrtong ba la pynbna da ka seng ki la poi sha ka 61 ngut.
Kham hashwa, u nongaiktien ka Congress u Pawan Khera u la kam ba ka jingpynbeit ïa ka jingïasam shuki hapdeng ki seng ba ïatreilang hapoh ka kynhun INDIA block ka la dep ban pynbeit.
U la ong, “Baroh la dep pynbeit, tang ka jingpynbna ba pura ka dang sahteng, ïa kaba yn sa pynbna ha ka por kaba biang.”
