New Delhi, Risaw:
U Myntri Rangbahduh ka ri, u Narendra Modi, ha ka lah sngi U Blei, u la ong ba ka India ka don ha ka “lynti ban pynduhjait” ïa ki kam lehnoh Naxal-Maoist, ha kaba palat 100 tylli ki distrik ki la lait na ka jingsynshar jong ka, ki la buh ban rakhe ïa ka Diwali da ka “jingsngew sarong bad burom” mynta u snem.
Haba kren sha ki shipai kiba don ha ka liengsuiñ INS Vikrant harud duriaw jong ka Goa, u Modi u la ïaroh ïa ki bor pahara na ka bynta ka “jingshlur bad ka jingaiti lut” jong ki, da kaba ai burom ïa ki namar ba ki la pynduna ïa ka sienjam jong ki Maoist na ki 125 tylli ki distrik shisnem mynshwa sha ki 11 tylli mynta ka sngi.
“Dei namar ka jingshlur bad ka jingnud ban aiti jong ki bor pahara jong ngi ba ka ri ka la lah ban ïoh sa kawei pat ka mawjam kaba khraw ha kine ki khyndiat snem ba la leit. Kane ka mawjam ka dei shaphang ka jingpynduh jait ïa ki kam pyntriem jong ki lehnoh Maoist. Ka ri ka don ha lynti ban lait na ki kam lehnoh jong ki kynhun Naxal-Maoist”, la ong u Myntri Rangbahduh.
U la ong ba shwa u snem 2014, lajan 125 tylli ki distrik ha kylleng ka ri ki don ha ka jingshah thombor jong ki Maoist. “Kane ka la nang duna namar ki sienjam ba la shim da ka sorkar ha kine ki phew snem ba la dep”, la ong u Myntri Rangbahduh.
Na kine ki 11 tylli ki distrik, tang lai tylli ki dang sah hapoh ka jingsynshar jong ki Maoist”, la ong u Modi bad bynrap, “Ha ka sien kaba nyngkong, ki briew ha kum kane ka distrik, ki rakhe ïa ka Diwali ha ka jingsuk. La sakhi ïa ka jingdie jingthied kaba kiew bha ha kine ki thaiñ ha kane ka GST Bachat Utsav. Ha ki distrik ba ka jingleh donbor jong ki Maoist shisien ka la pynjah wat ïa ka jingkren jong ka Riti Synshar, mynta ka mantra jong ka Swadeshi ka sawa,” u la ong.
U Modi u la ong ba lehse ka dei ka sien kaba nyngkong naduh ba la ïoh ïa ka jinglaitluid ba ki bor pulit ki ïakynduh ïa kum kane ka jingeh kaba khraw.
U la ong ba u ngeit ba ïa ka jingpang khlam jong kine ki 50 snem ba la dep yn sa jop.
“Ki (ki bor pulit) ki la ïoh ïa ka jingjop kaba 90 percent,” u la ong da kaba pynskhem ba ka jingïakhun ïa ka thma hapoh ka ri ka donkam ïa ka jingshaniah kaba khraw ban pynthikna ba ym dei ban don kano kano ka jingim kiba lui lui ka ban duh.
U la ong ba ki don ki thaiñ ha kaba ki Maoist kim shah ban shna skul, ki surok bad ki hospital, ki pynbthei ïa ki skul bad ki hospital bad ki siat ïap ïa ki doktor.
Ha kijuh ki thaiñ, ki surok bah ki dang shna, ki kam khaïi thymmai ki dang sdang, bad ki skul bad ki hospital ki tei ïa ka lawei kaba thymmai na ka bynta ki khynnah, la ong u Modi.
U Myntri Rangbahduh u la ai burom ïa ka jingjop namar ka jingleh niam, ka jingaiti lut bad ka jingshlur jong ki bor pahara.
U la ai khublei ruh ïa ki pulit kiba shlur kiba ïalam ïa ka jingïakhun pyrshah ïa ki kam jong ki lehnoh Maoist, da kaba ong ba ka jingïaleh pyrshah ïa ki kam pyntriem jong ki lehnoh ka la lah ban ïoh ïa ka jingjop namar ka jingaiti lut jong ki katto katne ngut ki pulit.
