New Delhi, Risaw:
Ki shipai jong ka India bad ka China ki la ïasam jingbam thiang markylliang ha ka sngi ba la rakhe ïa ka Diwali kum ka dak ban pynpaw ïa ka jingïabha ha ki bynta jong u Line of Actual Control (LAC) uba jrong naduh Ladakh haduh Sikkim bad Arunachal Pradesh, la ïathuh ki heh sorkar ha ka sngi Ba-ar.
Ki shipai jong ka tnat Indian Army bad ki shipai Chinese People’s Liberation Army (PLA) ki la pynlong ruh ïa kane ka jinglehkmen Diwali ha u snem ba la lah hadien ba ki arliang mamla ki la don hapdeng ka jingïapher jingmut na Depsang bad Demchok ha ka thaiñ Mihngi jong ka Ladakh, nangta ki ar tylli ki jaka ba khatduh ha shilynter ka LAC, la bynrap shuh shuh ki heh sorkar.
“Ki shipai China bad India ki la ïasam markylliang ïa ki jingbam thiang ha LAC ha ka sngi rakhe ïa ka Diwali, kaba long ka dak jong ka jingsngewbha hapdeng ki arliang mamla”, la thoh u nongaiktien jong ka Embassy jong ka China ha Delhi u Yu Jing ha ka rynsan X ha ka sngi Ba-ar.
Ka jingïasam jingbam thiang ha ki tamasa bad kiwei kiwei ki sngi ba kongsan jong ka ri ka la sangeh noh haduh katto katne snem hadien ba ka jingïakynad ha khappud ka India bad ka China kaba la sdang ha u bnai Ïaïong haduh Jymmang 2020.
Ki shipai India ki la sdang biang ïa ka jingpahara ha Demchok bad Depsang kaba don ha ka thaiñ Mihngi jong ka Ladakh ha u snem ba la lah hadien ka jingsangeh kaba la palat saw snem.
Kane ka la pynphai biang ïa ka jinglong jingman ha ki ar tylli ki jaka ba shakhmat sha kaei kaba ka la long shwa u bnai Ïaïong 2020 shwa ba kan sdang ka jingïakhun hapdeng ki shipai ka India bad ka China.
Da ka jingjop, ki shipai India bad ki PLA ki la ïaid lait ïa ka jingsahkut kaba ar snem ha ka jingïakren — ka sien kaba saw bad kaba khatduh jong ka jingpynïakhlad na ka Patrolling Point-15 ha ka thaiñ Gogra-Hot Springs ka la jia ha u bnai Nailur 2022 hadien kata ka jingïakren ka la sahkut noh.
Ha ka jingbishar bniah jong ka ha kaba kut jong u snem 2024, ka tnad ïada ri ka la ong ba ka “jinglong jingman baroh kawei” ryngkat bad ka LAC bad ka China ka long kaba “biang hynrei kaba sngewkhia.”
Ha u bnai Jylliew, ka India ka la pynbor ïa ka jingpynbeit ba neh jong ka jingpynbeit ïa u pud u sam bad ka China bad ka la pynpaw ïa ka jingdonkam ban pynbeit ïa ki mat ba jylliew lyngba ka Road Map ba la buh ryntih jong ka jingïatreilang bad ka jingpynjem ïa ki jingeh, ha ka por ba ïakren hapdeng u Myntri ka tnat ïada ri u Rajnath Singh bad u Myntri kajuh ka tnat jong ka China u Admiral Dong Jun.
