Patna, Risaw:
Kumba la buh jingkheiñ, la ong ba ha ki lai taïew naduh ba la pynbna ïa ka ilekshon sha ka ïingdorbar thawaiñ ha Bihar nalor ki ilekshon shiteng samoi ha ki hynñiew tylli ki jylla, ki bor pynïaid ki la ïoh ban kurup ïa ka pisa, ka kyiad, ki drok, ki mar kordor bad ki jingai sngewbha ba shu ai ei kiba shongdor T.71.32 klur, katkum ka jingpynbna jong ka Election Commission (EC) ha ka sngi Ba-ar.
“Haduh ka 21 tarik u Risaw, ki la don palat 71.32 klur tyngka ka pisa, ka kyiad, ki drok, ki mar kordor bad kiwei kiwei ki jingai sngewbha la ïoh ban kurup lyngba ka rukom treikam kaba ïatreilang kaba kynthup ïa ki tnad pyntreikam ba bun jait ha kylleng ki Jylla/UT (Union Territory) bapher bapher,” ong ka kynhun EC.
Haduh ka sngi Ba-ar, ki la don kumba 650 tylli ki jingujor halor ka jingkynnoh ba pynkheiñ ïa ka Model Code of Conduct (MCC) ha Bihar bad ha ki jylla ban pynlong ïa ka ilekshon shiteng samoi ha ka C-Vigil app jong ka EC, ong ka tyllong khubor. Na kine, 612 tylli la pynbeit hapoh 100 minit, la ong ka khubor.
Ka EC ka la ong ba la buh haduh 824 tylli ki kynhun Flying Squad ha Bihar ban shimkhia ïa ki jingujor halor ka jingpynkheiñ ïa ka MCC. Ka Bihar kan pynlong ïa ka jingthep vote ha ki ar bynta, kata ha ka 6 tarik u Naiwieng bad ka 11 tarik u Naiwieng.
Ka jingñiew vote kan long ha ka 14 tarik u Naiwieng.
Ha ka 6 tarik u Risaw, ka EC ka la pynbna ïa ka por ban pynlong ïa ka ilekshon sha Bihar bad kumjuh ruh ïa ki 8 tylli ki ilekshon shiteng samoi sha ka ïingdorbar thawaiñ ha Jammu & Kashmir, Rajasthan, Jharkhand, Telangana, Punjab, Mizoram bad Odisha.
Da kane ka jingpynbna, ka MCC ka la treikam, kaba la pynlong ïa ka jingpeitngor kaba pyrkhing bha halor ka jinglah ban sam ïa ki jingai sngewbha da ki seng bad ki kyrtong ban pynbiej bad thong ïa ki nongthep vote.
