New Delhi, Risaw:
U Ashok Gehlot, uba long u heh nongïalam jong ka seng Congress, u la ïakynduh ïa u heh ka seng RJD, u Lalu Prasad, ha ka sngi Balang, na ka bynta ban pynbeit ïa ki jingïapher jingmut hapdeng ki seng ba ïatreilang hapoh ka kynhun INDIA Bloc, shwa ka ilekshon ha Bihar.
U la ban jur ïa ka jingkordor jong ka Bihar ha ka saiñ hima sima hadien ba ka synjuk ka la shah rem ha Maharashtra, da kaba khot ïa ka jingïatylli ban pynliem ïa ka kynhun NDA, kaba u la kynnoh ba ka pynïapra ïa ka imlang sahlang bad pynsniew ïa ka ïoh ka kot.
Ka jingïakynduh jong u Gehlot ïa u Lalu Prasad, kumba la tip, la ong ba ka long halor ka jingthmu ban weng ïa ki jingeh kiba mih hapdeng ki seng ba ïatreilang hashwa ka ilekshon ha Bihar.
Ka jingkulmar hapdeng ki seng ba ïatreilang ka la pynmih ïa ka jingkhlad noh ha ka jingïatehlok jong ka kynhun INDIA. Hadien ka jingïalang, u Gehlot u la pynpaw ba ka Bihar ka long kaba “kongsan haduh katta katta” na ka bynta ka kynhun synrop ka liang pyrshah. Um shym la jubab lada ka Congress kan pynbna ïa u khun jong u Lalu Yadav u Tejasshwi Yadav kum u kyrtong ban ïakhun na ka bynta ka shuki Myntri Rangbah.
“Balei phi kwah ba ngan pynbna kum kane?” U Gehlot u la ong, da kaba kiar na ki jingkylli jong ki nongthoh khubor.
U Gehlot u la ong, “Phi la ïohi ïa ka jingïajan hapdeng u Rahul bad u Tejashwi ha ka por jong ka Voter Adhikar Yatra ar bnai mynshwa ha kaba kine ki arngut ki nongïalam ki la ïaid kylleng ka jylla. Kin sa shim ïa ka rai kaba biang ha ka por kaba biang”.
Na ki 243 tylli ki konstitwensi ha ka ïingdorbar, ka RJD bad ka Congress ki ïakhun 143 tylli bad 61 tylli. Hynrei baroh ar tylli ki seng ki ïaid sha ka “jingïatreilang” ha ym duna ïa ka san tylli ki konstitwensi.
Ka Congress ka mih ruh ban ïakhun pyrshah ïa ki kyrtong jong ka seng CPI ha ki lai tylli kiwei pat ki konstitwensi.
Mar ïa poi, u Gehlot u la ïathuh ha ki lad pathai khubor ba “ka jingïatreilang ha ki san ne shiphew tylli ki konstitwensi kam dei ka kam kaba khraw.” Hadien ka jingïakynduh bad u Prasad, u la ong “ngi kyrmen ba kiei kiei kin sa ïaid beit ha ka tarik ba khatduh ban weng noh ïa ki kot thep kyrteng mynta ka sngi”.
San tylli na kine ki konstitwensi ki hap ha ka bynta ba nyngkong jong ka ilekshon, ha kaba ka por ba khatduh ban weng noh ka la kut noh ha ka lah sngi U Blei.
“Ka long kaba kongsan haduh katta katta ïa ngi ban jop ïa ki jingthep vote. Khamtam eh hadien ba ka jingïatylli ha kaba ka Congress ka la long shi bynta ka la duh noh ïa ka Maharashtra. Ki jingthep vote ha Bihar kin buh ïa ka sur na ka bynta ka saiñ pyrthei ha ka ri.
Ka long kaba donkam eh ba ka kynhun NDA, kaba la wanrah ïa ka jingïapher ha ka imlang sahlang bad pynthut ïa ki kam ha ka ban khanglad ïa ka ïoh ka kot, kan ïoh ïa ka jingshah pynphaidien.” La synran lang ïa u Gehlot da u Krishna Allavaru uba dei u nongpeit ïa ka AICC ha Bihar.
U Gehlot bad u Allavaru ki la ong ba ka Mahagathbandhan ka la pynlong ïa ka jingïalang bad ki lad pathai khubor ha ka jylla kaba dang ïakhun ïa ka jingthep vote, hynnin ka sngi.
