Kolkata, Risaw:
Ka seng Trinamool Congress (TMC) ka thmu ban pynlong ïa ka jingïalang bad ka jingïaid paidbah ha Kolkata ban pyrshah ïa ka jingthmu ban pyntreikam ïa ka Special Intensive Revision (SIR) jong ka thup kyrteng thep vote ha West Bengal. U Kunal Ghosh jong ka TMC, u la pynthikna ba ki nongïalam ba hakhliehduh jong ka seng, kiba kynthup ïa ka Myntri Rangbah ka Mamata Banerjee bad u National General Secretary jong ka seng, u Abhishek Banerjee, kin ïashim bynta ha kane ka jingïalang ba kongsan, kaba lah ban long ha ka taïew kaba ar jong u bnai Naiwieng.
Ha ka jingkren sha ki lad pathai khubor ha ka sngi Balang, u Ghosh u la pynmih ka jingmaham kaba tyngeh pyrshah ïa ka jingshah pyndik ki nongthep vote hapoh ka SIR bad u la ong ba ym dei ban weng ïa uwei ruh u nongthep vote na ka thup ba la pynkylla thymmai.
U la ong ruh ba ka Trinamool kan sa pynlong ïa ka prokram kaba bniah pyrshah ïa ka kam saiñ pyrthei jong ka BJP halor ka thup kyrteng jong ki nongthep vote. U la ong shuh shuh ba ïa ka por ban pynlong ïa kane ka jingïakhih shen yn sa pynbna da ki nongïalam ba hakhliehduh jong ka seng.
Kane kam dei ka sien kaba nyngkong ba ka TMC ka la pyrshah ïa ka jingthmu ban pyntreikam ïa ka SIR ha West Bengal. Kham hashwa, u Rajib Banerjee jong ka Trinamool, u la pynmih ïa ki jingbyrngem ba paw pyrthei halor katei ka kam, da kaba pynbna ba katei ka seng, kan pyrshah ïa ka jingpyntreikam ïa ka SIR ha Bengal. U la maham ba “ka snam kan tuid” lada weng noh ïa ki kyrteng jong ki nongthep vote ha ka por ba pynkylla.
Ha kajuh ka por, u nongïalam ka BJP ha ka ri u Sukanta Majumdar u la ther tyngeh ïa ka sorkar Bengal kaba pyrshah ïa ka SIR ha kane ka Jylla. Haba ong ba kane ka jingpyntreikam halor ka SIR ka long kum ka jingtreikam kaba man ka por jong ka kynhun ba dei khmih halor ki kam ilekshon, u Majumdar u la ong ba ka TMC ka lah ban leit sha ka Election Commission lane ban tied ïa ka jingkhang jong ka Supreme Court lada ki don kino kino ki jingpyrshah ha kaba ïadei bad ka SIR.
Ka Commission ka dang pynkhreh ïa ka jingthmu ban pynkylla kyrpang ïa ki thup kyrteng jong ki nongthep vote hashwa ka ilekshon sha ka ïingdorbar thawaiñ jong u snem 2026. Ha u bnai Nailur, ka kynhun jong ka Commission ba la ïalam da u Deputy Election Commissioner u Gyanesh Bharti ka la leit jngoh ïa ka Bengal ban bishar bniah ïa ka jinglong ba la khreh jong ka bad ban pynlong ïa ka jingai jinghikai ïa ki ophisar ba dei khmih ha ka kam ilekshon ha ki distrik.
