Hyderabad, Risaw:
Kumba long ka seng AIMIM bad ka CPI, ka CPM bad ka Telangana Jana Samithi (TJS) ruh ki la rai ban kyrshan ïa u kyrtong ka Congress u Naveen Yadav ha ka ilekshon shiteng samoi ka ban long ha ka 11 tarik u Naiwieng ha Jubilee Hills.
Ha ka sngi Balang, u State Secretary jong ka CPM, u John Wesley, u la pynbna ba ka seng jong u, kan kyrshan ïa u kyrtong ka Congress, katba u pynpaw ba katei ka sienjam, ka dei kaba thmu ban pynliem ïa ka BJP.
Hynrei u Wesley u la pynskhem ba ka CPM kan dang ïai bteng ban pynpaw ïa ki jingeh jong ki briew sha ka sorkar, da kaba kdew ïa ki mat kum ka jingshim jaka na ka bynta ka Regional Ring Road (RRR). U la ban jur ba dei ban ïoh ïa ka jaka tang da ka jingmynjur jong ki paidbah.
Ha kajuh ka por, ka TJS ka la pynbna ban kyrshan ïa u kyrtong ka Congress hadien ba u President ka TPCC u B Mahesh Kumar Goud u la ïakynduh ïa u hehduh jong ka u Prof Kodandaram ha ophis treikam jong ka seng ha Nampally.
Haba kren sha ki lad pathai khubor ha ophis treikam jong ka TJS, u Mahesh Goud u la ïaroh ïa ka bynta jong u Prof Kodandaram ha ka jingïakhih jong ka Telangana, bad ka jingtrei shitom jong u kaba hok bad lenlade ban ïoh ïa ka jinglong jylla.
U la ong ba ka Congress kan kynmaw beit ïa ka bynta jong ka TJS ha ka ilekshon 2023 kaba la pynkut noh ïa ka jingsynshar jong ka BRS kaba la neh shisnem. U Prof Kodandaram u la ong ba ka Congress ka la pynthikna ïa ki ïa ka lad ban ïashim bynta ha ka synshar khadar bad ruh ban weng ïa ki jingeh jong ka jingkyrduh kam. “Nga la wanrah ïa kine ki mat baroh ha ka jingtip jong u heh ka TPCC shwa ban pynpaw ïa ka jingkyrshan jong ngi ïa ka Congress,” u la ong.
