Kolkata, Risaw:
Kum ka jingther tyngeh ïa ka BJP halor ka “jingsngap jar” jong ka halor ka jingïap da kaba pynïap ïalade jong kawei ka doktor kynthei ha Maharashtra hadien ba la kynnoh ba ka la shahleh beijot, ka Trinamool Congress ha ka sngi Saitjaiñ ka la lyngngoh hato mynta ka seng BJP ka la kylla long “ka jingduhnong ha ka jingsngew”.
Ka Shashi Panja, Myntri ka West Bengal kaba dei ruh u nongaiktien jong ka TMC, ka la ong ba kan jin da la mih ka jingkhihwin lada kum kane ka jingjia ka la jia ha West Bengal.
Kane ka doktor kynthei, kaba trei ha kawei ka hospital sorkar ha Satara distrik jong ka Maharashtra, la lap ba ka sahkut ha kawei ka kamra jong ka hotel, ha ka miet jong ka sngi Palei, ha kaba ka la iehnoh ïa ka jingthoh ha ka kti jong ka, kaba kynnoh ïa u pulit Sub-Inspector, ba u la leh beijot bad pynkhia jingmut jingpyrkhat ïa ka, ong ki heh sorkar.
“Ngi la tip ba ka BJP haduh mynta ka la shah pynduhnong ha ka saiñ pyrthei. Hynrei hato ka seng mynta ka la shah pynduhnong ha ka jingsngew ruh? Kam shym la kren ei ei halor ka jingjia kaba sngewsih ha Satara,” ka la ong ha ka jingïalang bad ki nongthoh khubor hangne.
“Hangno ka sur jong ki lad pathai khubor mynta? Balei ki lad pathai khubor jong ka ri ki sngap jar? Lada kane ka jingjia ka la jia ha West Bengal, baroh kawei ka jylla kan khihwin lada ki dkhot jong ka Women’s Commission bad Human Rights Commission kin leit sha ka jylla,” la ong ka nongïalam ka TMC.
Ki pulit ha ka sngi Saitjaiñ ki la kem ïa uwei na ki arngut ki briew kiba ka doktor ka la jer kyrteng ha ka jingthoh ha ka lynghoh kti jong ka, na Pune, la ïathuh ki heh pulit.
Ka Panja ka la bynrap: “Hangno kine ki tnad, bad ki sur kiba pyrta na ka bynta ka hok? Hato kine ki tnad kim ju leit sha ki jylla ba la synshar da ka BJP ha kaba ka don ka ‘sorkar ar tylli ki Engine’? Lane kine ki dei kiba la buh kyrpang tang na ka bynta ka West Bengal?”
