Patna, Risaw:
U Tejashwi Yadav, u nongïalam ka Rashtriya Janata Dal (RJD) uba la shah jied kum u kyrtong Myntri Rangbah ka jylla ha Bihar, u la shah kyntait ban pynlong ïa ka jingïalang paidbah ha Khagaria ha ka sngi Saitjaiñ, da kaba kynthoh ïa ki daw jong ka jingshngaiñ namar ka jingïalang ilekshon jong u Myntri ka tnat ki kam pohïing jong ka sorkar pdeng, u Amit Shah, kaba la long ha marjan ka jaka jong u, la ïathuh ka tyllong khubor.
Da kaba khot ïa ka kum ka “jingsynshar donbor,” u Yadav, uba dei ban kren ha ki jingïalang paidbah ha ki lai tylli ki thaiñ Parbatta, Alouli bad Khagaria – u la ong, “U paidbah ha ka jingïalang ilekshon jong ngi u pyntieng ïa ka BJP (Bharatiya Janata Party), hynrei ki paidbah kim shym ngop bad jingpynbor jong ki ha kane ka kynti.”
“Um shym ïoh jingbit ban pynlong ïa ka jingïalang ilekshon ha madan Sansarpur kaba don marjan bad ka Jawaharlal Nehru Memorial Cricket (JNKT) Ground ha kaba la tyrwa ban pynlong ïa ka jingïalang jong u Amit Shah,” ong uwei u heh sorkar ha ka lad phah khubor, lyngba ka phone, ïa ubym shym kwah ban pynpaw kyrteng.
U la ong ba la kyntait ban ai ka jingbit namar ki daw “jong ka jingbym shngaiñ ba pura” bad kam don jingïadei eiei bad ka saiñ pyrthei, da kaba bynrap ba kiwei pat ki jingïalang jong u Yadav ha Parbatta bad Alouli kin ïaid beit kumba ju long.
U Yadav, uba la sdang ïa ka jingïakhun ilekshon ha ka sngi Thohdieng, shisngi hadien ba la pynbna ïa u kum u nongïakhun pyrshah ha ka shuki Myntri Rangbah ban ïakhun na ka liang pyrshah, u la pynlong san tylli ki jingïalang paidbah ha Simri Bakhtiyarpur (Saharsa), Darbhanga, Muzaffarpur, Samastipur bad Vaishali, bad u la pan vote ban kyrshan ïa ki kyrtong jong u na ka INDIA block.
Haba kynthoh ïa ka jingkren jong u Myntri Rangbahduh ka ri, u Narendra Modi, u Yadav, u ong, “U Myntri Rangbahduh, u ong ba kan ym don shuh ka jingsynshar riewkhlaw ha Bihar, hynrei, ki don ki jingpynïap briew bad ki jingshah siat ha ka por mynsngi ha Bihar, bad palat 55 tylli ki kam thok, ki la pynkhih ïa ka jylla, kaba u Myntri Rangbahduh hi u la kdew na rynsan.” U la ong, “U Myntri Rangbahduh u dei ruh ban jubab ïa ki jingkylli halor ka suk ka saiñ bad ka bamsap ha Bihar.”
Ha kajuh ka por, ka jingbym ai jingbit ïa ka jingïalang paidbah jong u Yadav ka la ailad ïa ka kynhun synrop jong ka Liang Pyrshah ban pynpaw ïa ka mat halor ka jingkynnoh jong ka jingsynshar donbor jong ka sorkar NDA kaba bat ïa ka jingsynshar. “Ki briew ki peit lut ïa kiei kiei baroh, bad kin leh hok ha ka ilekshon”, la ong ki nongïalam ka RJD ha ka thaiñ.
