New Delhi, Risaw:
Da ki spah ngut ki nong India ki dei napdeng palat 1,000 ngut ki briew kiba la phet krad na Myanmar sha Thailand ha kane ka taïew ba la lah hadien ba ki shipai jong katei ka ri ki la leit khynra ïa kawei na ki Cyber ba jur ki kam beaiñ jong ka Southeast Asia, la ïathuh ki tyllong khubor kiba na ka thaiñ bad nabar ri.
Ka lad pathai khubor jong ka Thailand, ka Khaosod, ka ïathuh ba ki don 399 ngut ki nong India, kiba dei ka kynhun kaba heh tam napdeng kiba la phet krad, kiba la ïaid lyngba sha Thailand, wat la ïa katei ka jingkheiñ, ym shym la lah ban pynshisha da lade.
Ka Ministry of External Affairs jong ka India kam shym la kren eiei halor kane.
Kitei ki nong India ki dei napdeng ki briew kiba la phet krad na ka jaka ba pawnam jong ka KK Park ha ka thaiñ Myawaddy jong ka Myanmar bad ki la rung sha Mae Sot distrik jong ka Thailand hapdeng ka sngi Balang bad ka sngi Thohdieng, la ong ka tyllong khubor kaba la wan na ki heh nongsynshar ka Thai.
Ka jingphetwir jong ki paidbah ka la long hadien ka jingkhynra kaba la sdang ha kaba sdang jong ka taïew da ka kynhun shipai jong ka Myanmar ha ka KK Park, ka jaka kaba heh kaba pawnam bha na ka bynta ki kam thok jong ki cyber ban shna ïing.
Ha kine ki khyndiat snem ba la dep, ki jaka leh thok Online kiba la saphriang bha ki la nang kiew ha ki thaiñ khappud jong ka Myanmar hapdeng ka jingïakynad kaba la slem bha jong ka ri.
Bun na kito kiba trei ha kine ki jaka ki dei ki lanot kiba la shah die ha ki nongkhaïi briew, katba kiwei pat ki ïasoh da ka mon sngewbha, la pynngop da ka jingkular ban ai da ka kamai kaba heh ha ka ban leh kam sniew kaba heh da ki klur tyngka.
Ki heh sorkar ka thaiñ, ki ïathuh ha ka AFP, ba kumba 40 ngut ki briew, kynthup ïa ki nong Taiwan bad ki nongshong shnong jong ki katto katne ki ri jong ka Africa, ki la ïaid lyngba ïa ka wah Moei sha Thailand ha ka sngi Thohdieng, da kaba pyndonkam ïa ki lieng rit.
Ki bor pahara jong ka Thailand ki la khnih bniah ïa ki tiar bad ki kot ki sla jong ki shwa ban kit ïa ki ha ki trok, kumba la paw ha ki lad phah khubor.
Ka Tak Provincial Office jong ka Thailand, ka ïathuh ba ki don 1,049 ngut ki briew, kiba la ïaid lyngba na Myanmar sha Mae Sot, hapdeng ka step jong ka Sngi Balang bad ka Sngi Thohdieng, kaba kiew bha na ka 677 ngut ha ka Sngi Palei.
Kane ka kynhun ka kynthup ïa ki trai ri India, Pakistan, Vietnam, Myanmar, Thailand, bad palat shiphew tylli kiwei pat ki ri, watla ki bor synshar jong ka Thailand ki ong ba kiba bun ki dei ki shynrang briew kiba na China.
