Bengaluru, Risaw:
Haba ki Myntri kiba ïasoh bad u Myntri Rangbah ka jylla u Siddaramaiah i kumba ki la rai ban pynduh noh ïa ki kam jong ki ban ïarap ïa u ban pynkylla bad bhah kam ïa ka kynhun Myntri bad ban bteng ïa ka kam jong u, u Symbud Myntri Rangbah u DK Shivakumar uba angnud ban long u Myntri Rangbah ban sa wan, u don ïa ka kam kaba thymmai kaba la buh na ka bynta jong u.
Lada ki heh nongïalam ki ai ka jingmynjur ban pynkylla bad ailad ïa u Siddaramaiah ban bteng kum u Myntri Rangbah hadien ba u la pyndep ar snem shiteng ha ka kam, u Shivakumar u lah ban pynbor ïa ki nongïalam ba hakhliehduh na ka bynta ka jingïateh kular kaba thymmai.
La ngeit ba ka kynhun nongïalam jong ka seng ka la khmih bniah ïa ka jingïateh ha u snem 2023 ha kaba ïa ka post Myntri Rangbah la dei ban ïasam mar katjuh hapdeng u Siddaramaiah bad u Shivakumar. Hynrei u Siddaramaiah u la kyntait ba ka don kum kata ka jingïateh kular.
U Priyank Kharge, Myntri ka tnad RDPR bad IT/BT, ha ka sngi Saitjaiñ, u la ong ba lada hap ban bujli thymmai ïa ka kynhun Myntri ne ka bor synshar hap ban kylla, baroh arngut u Myntri bad u DCM kin rai da ka jingïasyllok lang bad ki heh sorkar.
Hadien ba u Myntri ka tnad Housing u Zameer Ahmed Khan u la ong ba u kloi ban iehnoh ïa ka kam ban ïarap ïa u Siddaramaiah ban pynkylla ïa ka kynhun Myntri, u myntri ka Revenue u Krishna Byre Gowda ha ka sngi Saitjaiñ u la ong ba ma u ruh un iehnoh kam lada ki heh sorkar ki dawa ïa u ban leh kumta.
“Ha ka por ba ka seng ka la wan ha ka bor, ka la don ka jingtyrwa ba dei ban ailad ïa kito kiba dei hok ban long Myntri hynrei ki shong shabar, ngam don jingtip lano bad aiu ka kynhun ba halor kan rai, la kan long ka jingpynkylla ïa ka kynhun Myntri ne ka jingkylla pahara”, u la ong.
