Ranchi, Risaw:
Da kaba shim khia ïa ka jingkynnoh leh khlem da shimkhia da ki heh ka tnat ka koit ka khiah hadien ba san ngut ki khynnah ki la ïoh ïa ka jingpang HIV na ka snam ba la ai ha Sadar Hospital ha Jharkhand West Singhbhum distrik, u Myntri Rangbah ka jylla u Hemant Soren u la hukum ban sospon noh ïa u Civil Surgeon bad kiwei kiwei ki heh kiba la lap ba ki dei kiba donkti halor kane ka jingleh bymsuidñiew.
U Myntri Rangbah ka jylla u la pynbna ruh ban ai jingïarap pisa mar T. 2 lak sha kawei pa kawei ka longïing kaba la shah ktah, ryngkat bad ka jingai jingsumar khlem jingsiew ïa ki khynnah kiba ngat ha kane ka jingpang.
“Hadien ka khubor ba la ai da u khñiang jingpang HIV sha ki khynnah ba don jingpang Thalassemia ha Chaibasa, la ai jingbthah ban pynsangeh noh ïa u Civil Surgeon ka West Singhbhum bad kiwei kiwei ki heh kiba donkti,” ong u Hemant Soren ha ka jingthoh ha ka rynsan X.
Ka jingkynnoh ba ka jingbym shimkhia jong ki nongsumar ka la paw pyrthei haba uwei u nongpang Thalassemia uba hynñiew snem ka rta u la ïoh ïa ka jingpang HIV ha ka 18 tarik u Risaw, katto katne taïew hadien ba la ai snam ïa u ha kaba sdang jong u bnai Nailur. Ki bahaïing jong une u khynnah ki la ujor sha u Deputy Commissioner bad sha ki bor synshar ka jylla. Ka Jharkhand High Court ka la shimkhia ïa kane ka kam bad ka la hukum ban tohkit ha kine ki khyndiat sngi jong ka taïew ba la leit. Ha ka sngi kaba bud, ka kynhun kaba don 5 ngut na Ranchi ka la leit sha Chaibasa bad pynlong ïa ka jingtohkit ha Sadar Hospital.
Ha kane ka kynhun ki kynthup ïa u Director ka tnad ka koit ka khiah u Dr Dinesh Kumar, u Dr Shipra Das, u Dr S. S. Paswan, u Dr Bhagat, bad u Doktor Civil Surgeon ka Chaibasa u Dr Sushanto Kumar Manjhi, ryngkat u Dr Shivcharan Hansda bad u Dr Meenu Kumari. Kane ka kynhun ka la leit ban jurip ïa ka jaka buh snam jong kane ka hospital bad ïa ka Ward jong ka PICU, bad la lum ïa ki jingtip kiba bniah na ki bahaïing jong ki khynnah kiba la shah ktah.
Ha ka jingtohkit la lap ba sa saw ngut ki khynnah kiba la pynshisha ba ki don ïa u khñiang jingpang HIV. Arngut napdeng kine ki khynnah ki dang sahkut haduh mynta ha PICU Ward jong ka Sadar Hospital. Hadien ka jingtohkit, u Dr Dinesh Kumar, u la pyntip ba ka jingpyrshang ka dang ïaid shakhmat ban lap ïa ka tyllong jong kane ka jingpang.
“La wad bniah ïa ka tynrai jong ka jingpang. La bthah ïa ki bor pynïaid hospital ban leh ïa ka test snam jong ki khynnah,” la ong u Kumar.”Ki lah ban don ar tylli ki daw ba ki khynnah ki ïoh ïa ka jingpang HIV, la ai snam ba la ïoh ïa ka jingpang ha ki lane ka jingpang ka wan rung ha ka met jong ki na ki tyllong kiba nabar, kaba dang tohkit bniah,” u la bynrap.
Katkum ka jingong u Dr Kumar, ki don baroh 515 ngut ki nongpang HIV ha ka distrik baroh kawei bad 56 ngut kiba don ïa ka jingpang Thalassemia. U la ïathuh ba ïa ka kaiphod ba pura yn sa aiti sha ka tnad.
Ha kajuh ka por, ka kynhun ki doktor ka la lap ïa ki katto katne ki jingduna bad ki jingbym ïahap kiba jur bha ha ka por ba ki jurip ïa ka jaka buh snam bad ka Laboratory. U Dr Kumar u la ong ba la ai por shi taïew ïa ki ban pynbeit ïa ki jingduna ha ka Blood Bank bad ka Laboratory. Hapdeng kane ka jaka buh snam kan treikam tang kum ka jaka ai jingïarap kyrkieh na ka bynta ar ne lai sngi.
