Patna, Risaw:
Ka seng RJD ka la beh seng ïa ki 27 ngut ki nongïalam, kynthup ïa arngut ki MLA, halor ka jingpyrshah seng jong ki ha Bihar.
U heh nongïalam jong ka seng RJD ha ka jylla u Mangani Lal Mandal u la ong ba ki nongïalam ba la shah beh ki pynkheiñ ïa ka aiñ jong ka seng bad pynpait ïa ka jingïatylli jong ka Mahagathbandhan. Ka thup kyrteng jong kine kiba la shah beh ka kynthup ïa arngut ki MLA ba mynta, uwei u MLC, bad saw ngut ki nongthaw aiñ barim.
Ka ilekshon sha ka ïingdorbar thawaiñ jong ka Bihar kan long ha ki ar bynta ha ka 6 tarik, Naiwieng bad ka 11 tarik u Naiwieng, bad ka jingpynbna ïa ki nongjop kan sa long ha ka 14 tarik u Naiwieng.
Ha ka ilekshon sha ka ïingdorbar thawaiñ ka jylla Bihar, ka Rashtriya Janata Dal (RJD) ka la beh seng ïa ki 27 ngut ki nongïalam ha ka lah sngi U Blei halor ka jingdon bynta jong ki ha ki kam pyrshah seng bad ban leh bym kohnguh ïa ki kyndon jong ka seng.
U Chairman ka RJD ha ka jylla u Mangani Lal Mandal u la ong ha ka kyrwoh ba “Ka RJD ka la shim ïa ki kyndon pynshitom pyrshah ïa ki nongïalam hadien ba ka la lap ba ki pynleit jingmut ha ki kam pyrshah seng pyrshah ïa ki nongmihkhmat jong ka RJD ne Mahagathbandhan”, la ong ka kyrwoh.
U Mohammad Kamran (Govindpur) bad u Chote Lal Rai (Parasa) ki dei ki MLA ba shah beh seng. Nalor kiba shah weng kam shipor, ki long u MLC barim u Ganesh Bharti bad saw ngut ki nongthaw aiñ barim kiba kynthup ïa u Ram Prakash Mahto, u Anil Sahni, u Saroj Yadav, bad u Anil Yadav.
Ka Ritu Jaiswal, u Akshay Lal Yadav, u Ram Sakha Mahto, u Avneesh Kumar, u Bhagat Yadav, u Mukesh Yadav, u Sanjay Rai, u Kumar Gaurav, bad u Rajeev Kushwaha ki dei kiwei pat ki riew saiñ pyrthei kiba la shah beh.
