New Delhi, Risaw:
U Chief Election Commissioner u Gyanesh Kumar ha ka lah sngi U Blei u la ong ba naduh ka miet jong kane ka sngi, la khang bad pynkut noh ïa ki jingpynrung kyrteng jong ki nongthep vote ha ki jylla ba dang pynlong ïa ka bynta kaba ar jong ka Special Intensive Revision (SIR).
U Chief Election Commissioner (CEC) u Gyanesh Kumar ha ka lah sngi U Blei u la pynbna ba ïa ka bynta kaba ar jong ka Special Intensive Revision (SIR) yn pynlong ha kylleng ki 12 tylli ki jylla bad ki Union Territory, ha kaba ïa ki thup kyrteng jong ki nongthep vote na ka bynta kitei ki thaiñ la buh ban khang noh ha ka por shiteng miet.
U la ong ba hadien kata yn ai ïa ki nongthep vote ïa ki phorm jingkheiñ briew kiba kyrpang kiba don ïa baroh ki jingtip ba donkam.
Haba kren ha ka jingïalang bad ki nongthoh khubor, u CEC Kumar u la pyntip ba ka SIR ka la sdang hynnin ka sngi ha Andaman bad Nicobar Islands, Goa, Puducherry, Chhattisgarh, Gujarat, Kerala, Madhya Pradesh, Uttar Pradesh, Rajasthan, West Bengal, Tamil Nadu, bad Lakshadweep.
U la batai ruh ïa ka por ba bniah na ka bynta ka bynta kaba ar jong ka jingpyntreikam.
Ka Election Commission of India ha ka sngi Thohdieng ka la pyntip sha ka Madras High Court ba ka Special Intensive Revision (SIR) jong ka jingpynrung kyrteng ïa ki nongthep vote kan sdang hadien shi taïew ha Tamil Nadu.
Ïa kane ka jingai jingmut la wanrah da u nongïasaid aiñ u Niranjan Rajagopalan, uba mihkhmat ïa ka ECI, hakhmat ka kynhun nongbishar jong u Chief Justice Manindra Mohan Shrivastava bad u Justice G Arul Murugan haba la mudui ïa ka dorkhas da u MLA barim ka AIADMK u B Sathyanarayanan uba kynnoh ba la weng ïa ki dkhot jong ka AIADMK na ka thup kyrteng ha T Nagar Assembly konstitwensi ka la poi na ka bynta ka jingshah bishar bniah.
U nongïasaid aiñ u la pynthikna ba yn sa pynbeit ïa ka jingshem jingeh jong u nongujor ha ka por ba pynlong ïa ka SIR. Ka kynhun nongbishar ka la pynsangeh noh ïa ka jingbishar da shi taïew.
U nongmudui u la pynpaw ba ka jingpeit bniah na kawei ka thliew ïing sha kawei pat ha ki 229 tylli ki booth ha ka T Nagar konstitwensi ka la paw ba la don ïa ka jingpynrung kyrteng arsien, ka jingpynrung arsien, ka jingpynrung ïa ki nongthep vote ki bym dei ki nongshong shnong bad ki nongthep vote kiba la khlad noh ha ki 100 tylli ki booth.
Da kaba kynnoh ïa ki ophisar kiba don ha ka kyrdan booth ba ki ai kaiphod khlem da pynlong ïa ka jingpynshisha haba paw, u MLA barim u la ong ba ki bor ba dei peit kim shym la shim ïa ki sienjam kiba biang ban pynkhuid ïa ki thup kyrteng jong kum kine ki jingbym ïahap watla ki la aiti ïa ki sakhi.
U la kynnoh ba ka jingbym shimkhia na ka liang jong ki ophisar kiba don ha ka kyrdan jong ka booth ka long kum ka jingbym leh hok ïa ka kamram, bad ym tang ka jingbym lah ban treikam bha, kaba la pynlong ïa ka jingpynthut ïa ka jinglong hok jong ki thup nongthep vote ba khatduh kaba ktah ïaka jinglong hok jong ki jingthep vote ha ka ïingdorbar thawaiñ.
Kum kane ka jingleh ka bym lah ban pdiang jong ka ECI ka long pyrshah ïa ki kyndon jong ka Representation of the People’s Act, 1950, bad pyrshah ïa ka hok thep vote kaba la pynskhem katkum ka Article 326 jong ka Riti Synshar.
U Sathyanarayanan u la pynpaw ba u la shah rem ha ka ilekshon 2021 da ka jingïapher kaba rit kaba long 137 vote namar ka jingpyndam paidbah ïa ki nongthep vote bashisha na ka thup kyrteng jong ki nongthep vote.
