New Delhi, Risaw:
Katba ka jylla Bihar ka dang pynkhreh na ka bynta ka jingïakhun ïa ka ilekshon sha ka ïingdorbar jong ka jylla, u nongïalam ka Congress u Rahul Gandhi un sdang ïa ka jingïalap ilekshon jong u ha ka sngi Balang kata mynta ka sngi da kaba pynlong ïa ki jingïalang paidbah ha Muzaffarpur bad ha Darbhanga distrik.
Ïa u nongïalam jong ka liang pyrshah ha Lok Sabha, la khmih lynti ba un don ryngkat bad u nongïalam ka RJD, u Tejashwi Yadav, u kyrtong Myntri Rangbah ka kynhun INDIA block.
Ka kynhun synrop kaba heh ka la pyllait ïa ka thup treikam. Kane ka long hadien katto katne sngi jong ka jingïalang bad ki nongthoh khubor ha kaba la pynbna ïa u Tejashwi kum u kyrtong ban ïakhun ïa ka shuki Myntri Rangbah hadien ba la don bun sngi ka jingïaleh pyrshah hapoh jong ka halor ka jingsam ïa ki shuki.
Ka jingïalang ba nyngkong jong u Gandhi, kan long ha ka konstitwensi ba kyrpang jong ka Sakra ha Muzaffarpur, ha kaba ka seng, ka la pynïeng ïa u Umesh Ram, uba wan ba-ar ha ka jingïakhun ilekshon ha u snem 2020.
Ki dkhot ba la ïatreilang ha ka kynhun synrop kiba kynthup ïa u nongïalam jong ka seng CPI(ML) u Dipankar Bhattacharya bad u heh VIP u Mukesh Sahani ruh ki lah ban don lang.
Hadien kata, u Gandhi un kren ha kawei pat ka jingïalang ha Darbhanga distrik kaba marjan ban kyrshan ïa u kyrtong jong ka kynhun INDIA bloc, u Lalit Rai jong ka RJD.
Kane kan dei ka jingleit jngoh jong u Gandhi sha kane ka jylla ka ban pynlong ïa ka jingthep vote hadien ba la pynkut ïa ka ‘Voter Adhikar Yatra ha ka 1 tarik Nailur.
