Bhubaneswar, Risaw:
Ka jingtih shyiap be-aiñ ka la kylla long ka jingpynlut pisa kaba khraw ha katto katne tylli ki jaka ha ka jylla Odisha ryngkat bad ki kynhun runar ba la pynbeit ryntih kiba pynlong ïa ki kam da kaba pynkheiñ aiñ.
Katkum ki tyllong khubor, la ong ba ki la don 18 tylli ki par tih shyiap ha kylleng ki Tehsil bapher bapher – lai tylli ha ka wah Mahanadi ha Raghunathpur Tehsil, hynñiew tylli ha Mahanadi bad Chitrotpala ha Tirtol Tehsil, ar tylli ha ka wah Devi ha Jagatsinghpur, lai tylli ha Biridi, bad lai tylli ha Nuagaon Tehsil.
Wat hapdeng ka jingkhang ïa ka jingïaid ki kali heh, ki runar ba ju shalan tuh ïa u shyiap ki dang ïai bteng ban treikam da kaba pyndonkam ïa ki traktor, ki JCB, bad ki Sand Pump ban sei ïa shyiap um na ki rud wah da kaba pynkheiñ ïa ki jingbthah jong ka National Green Tribunal (NGT).
Kane ka la pynmih ïa ki jingma kiba jur ïa ka mariang. Ïa ki shyiap ba bun la kit sha ki karkhana Paradip, katba ki nongkhaïi ha kajuh ka por ki tih ïa ka khyndew kaba bun na ka bynta ban shna atoskhana.
Kane ka jingtih mar pohkhyndew khlem da peit bniah ka la pynsted ïa ka jingtwa khyndew harud ka wah Mahanadi, kaba buh jingma kaba khraw ïa ki shnong ha ki thaiñ Tirtol bad Kujang, bad kumjuh ruh ïa ka jingker jong ka wah Taladanda.
U SI ka Jagatsinghpur u Bhabani Shankar Udgata u la pynthikna ïa ki katto katne ki khubor ba la mih halor ka jingtih shyiap beaiñ bad u la ong ba la buh ïa ki pulit ban tehlakam ïa kane ka jingkhaïi beaiñ.
“Yn ym shah ïano ïano ban bteng ïa ka jingtih shyiap beaiñ. Ngin pynlong ïa ka jingpahara man ka por ïa ka rud wah, bad yn leh da kaba tyngeh ïa kiba donkti”, u la bynrap.
Haduh mynta ka sngi, la kurup 26 tylli ki kali kit shyiap, bad 15 ngut ki briew ki la shah kem. Nalor kata, ka tnad Revenue ka la kurup 16 tylli ki kali bad daiñ kuna ruh ïa ki trai jong ki.
Ha kaba ïadei bad kane, la ong ba ka jingshah dawa pisa jong ki trai par shyiap ka dang bteng haduh mynta. Ha ka sngi Balang, ki pulit jong ka Biridi ki la kem ïa 6 ngut ki briew ba kynthup ïa lai ngut ki kynthei na Parisankhari Sahi namar ba ki la byrngem ïa u nongthep shyiap ba la tip kyrteng kum u Rajesh Bhunya. La pynshisha ba kiba shah kynnoh ki la hiar thma ïa ka ophis jong ka camp jong u Bhunya ha ka jaka tih shyiap ha Sanawaibarei ha Biridi ha ka sngi Saitjaiñ ba la lah bad dawa pisa da T. 10 lak. Ki la byrngem ïa u da ki jingma kiba shyrkhei, bad ki la khynra ïa ka ophis jong u. Hadien ka jingujor ejahar jong u Bhunya ha thanat Biridi, la buh jingthoh ïa ka mukotduma, bad la kem ïa hynriew ngut ki briew. Ha kawei pat ka mukotduma, ki pulit jong ka Nuagaon, ki la kem ïa u Dillip Kumar Nayak, uba dei u Sarpanch jong ka Galdhari, namar ba u la pyrshang ban shim pisa da T. 5 lak na uwei pat u nongthep shyiap.
