Hyderabad, Risaw:
Ka sorkar Telangana kumba ka la thmu ban kynjoh sha ka thong na ka bynta ka jingmyntoi jong ki riewpaidbah bad ki nongshong shnong hi baroh kawei jong ka jylla, ka la sdang ban ïaid shakhmat ha kaba ïadei bad ki lad jingïarap katkum kane ka juk ba mynta.
Kane ka jingthmu, ka long da ka jingshakri jong ka AI, la ong u Myntri ka tnat IT and Industries u D Sridhar Babu.
U Sridhar Babu u la ong ba ka sorkar jylla ka thmu ban tei ïa ka AI economy kaba $5 billion, kaba la kyrshan da ki jingthmu kum ka AI City, ka AI University bad ka AI Innovation Hub.
Kane ka jingthmu pyntreikam kan ai jinghikai bad jingai jingmut ba kyrpang ïa ki heh sorkar ha ki lai bnai ban wan, kaba pynlah ïa ki ban ithuh bad pyntreikam ïa ki lad ki lynti kiba pynshong nongrim ha ka AI ha ka jingsynshar.
La khmih lynti ba uwei pa uwei u ophisar un jied ïa kawei ka jingeh kaba kongsan ha ka tnad jong ki ban pynbeit lyngba ka AI, ryngkat bad ki jingtyrwa ba la jied ban rah shakhmat kum ki Pilot projek.
Kumba la ïakren hashwa halor kane ka bynta, ki heh sorkar kin sa khmih bniah bad ban kitkhia ha ka ban sdang ban pyntreikam ïa ki kor ki bor kiba ïadei bad ka jingthmu pyntreikam, khnang ba ka jingangnud kan urlong kumba la buh.
U Sridhar Babu u la ong ba ka jylla ka la dep ban plie paidbah ïa ka Telangana Data Exchange (TGDeX), kaba dei ka Data Exchange kaba nyngkong eh ha ka ri kaba la pynïaid da ka AI, kaba long kum ka nuksa na ka bynta kiwei pat ki jylla. U Myntri u la ong ba palat 300 tylli ki jingshakri jong ki nongshong shnong yn pynbiang lyngba ki platform AI.
“Ka AI kam dei ban bujli ïa ki briew, ka dei ban pynlong ïa ka sorkar kaba kham shai, kaba kham stet bad kaba kham jan bad ki nongshong shnong,” u la bynrap.
Ha kane ka jingpyllait paidbah la don lang ki heh ophisar ba kynthup ïa u Chief Secretary u K Ramakrishna Rao bad u Special Chief Secretary u Sanjay Kumar.
