Chennai, Naiwieng:
U heh nongïalam ka seng TVK, u Vijay, u la pynbna ba ka seng, kan pynlong ïa ka jingïalang ba kyrpang jong ka General council, ha ka 5 tarik Naiwieng ha Mahabalipuram, ban rai ïa ka rukom treikam kaban sa leh hadien habud. Ïa kane ka jingpynbna la pynbna hadien ba la wai ka jingïalang jong ka Executive Committee kaba dang shu thaw thymmai ha ophis treikam jong ka seng ha Panaiyur.
Ha kajuh ka por, u Deputy General Secretary jong ka seng TVK u CTR Nirmalkumar u la ong ba ka jinglong jong ka TVK halor ka jingïateh lok ka dang sah kumjuh, kaba pyni ba ka seng ka dang kwah ban ïakhun marwei ha ka ilekshon sha ka ïingdorbar thawaiñ jong u snem 2026. U la jubab ïa ki jingkylli halor ki jingkren jong u nongïalam ka AIADMK, u Edappadi K Palaniswami, uba pynpaw ba ka lah ban don ka jingïatreilang bad ka seng TVK.
Haba kylli shaphang ka jingsdang biang ïa ka jingïalap paidbah jong u Vijay, u la ong ba kan sdang ynda ka sorkar jylla ka la thaw ïa ka rukom treikam na ka bynta ban ai jingbit ïa ki jingïalang saiñ pyrthei, kumba la bthah da ka Madras High Court.
U la kynnoh ba la khanglad ïa ki nongïalam jong ka kyrdan ba ar ban leit jngoh ïa ki bahaïing hasem jong ki lanot jong ka jinghia ha Karur bad u la buh jingkylli hato ka sorkar kan pynmih ïa ka thup kyrteng jong ki pulit ba la buh ha katei ka jaka ha katei ka sngi. Halor ka daw ba u Vijay u la poi slem sha katei ka jaka, u la ong ba ka dei namar ka jingslem jong ka kali ïalap ilekshon jong u hapdeng ka jingbun briew.
Ha ka jingthoh ha ka rynsan X, u Vijay u la ong ba u dang ïakynduh ïa ki nongïalam jong ka seng hadien “ka jingsngap jar kaba jrong bad kaba don jingmut.”
U la ong ba ka la dei ka por ba ki briew ka seng kin ïeng na ka bynta ki paidbah ka Tamil Nadu.
“Ym don mano mano ba lah ban khanglad ïa ka jingïaid lynti jong ngi.Wat ki nongïaleh pyrshah jong ngi, kiba pyrshang ban pynliem ïa ngi lyngba ka jingsian bad buit thok, ki tip ïa kane”, u la ong.
U Vijay u la ong ba namar ba ka jingsngew ha madan ka long kaba bha, ki sienjam kiba hadien jong ka seng TVK ki dei ban long kiba jai jai, kiba buh jingkheiñ bad kiba adkar.
