Shillong, Naiwieng 03
Ïa ka lympung ïalehkai U-23 men’s Col CK Nayudu Trophy (Elite Group) la lah ban sdang ha ka lah sngi U Blei ha madan ïalehkai jong ka MCA, kaba dei ka sngi kaba nyngkong ym shym la lah ban pynlong ïa kane ka jingïalehkai na ka daw ka jingjhieh bad sngem ka madan.
Kumta ha ka sngi kaba ar ba la ïoh ban sdang ïa kane ka jingïakhun, ka kynhun ïalehkai jong ka Goa hadien ba ka la jop ïa ka jingkynting pisa (toss) ka la ailad nyngkong ïa ka Meghalaya ba kan tied nyngkong.
Ha kum kane ka khep, la ïohi ba ki nongtied ka Meghalaya ki la shah pynkhyllem lut baroh hadien ba ki la lah ban kamai tang 102 ron na ki 28.1 over.
Haba wan beh ïa ka thong ka Goa ka la buh jingeh pat ïalade, hadien ba u Veer Yadav u la shah pynkhyllem noh khlem pat lah ban kamai wat tang shi ron ruh hadien ba u la ngat ha ka shrip kawang bol u PM Santhosh tang ha ka bol kaba saw jong ka over kaba nyngkong.
Hashwa ba kiei kiei kiba kham sniew kin wan jia ïa ka Goa, u lyoh ba dum u la wan ba un kah bad kane ka la pynlong ïa ki umpire ba kin pynkut noh shwa ïa kane ka sngi, ha kaba ka Goa ka la lah ba kan kamai shwa tang 4 ron bad shah pynhap 1 wiket.
Haba phai sha ka por ba wan bet ka Meghalaya, ka la shem jingeh bha ïalade namar ba la don ka khep ba ka la shah pynhap 6 wiket katba ka ron ba ka la lah ban kynjoh tang 40 ron. Hynrei la wan mih madan u Manish Sharma uba la pyrshang ban pynskhem ïa la ka jong ka kynhun da ka 33 ron na ki 56 tylli ki bol bad ba la ïarap ban kyrshan pat ïa u na sha shilliang da u Gavineal Marpna uba la lah ban kamai 22 ron.
Na ka liang ki nongkawang bol ka Goa, u Vinayak G Kunte (4/15 na ki 8 overs) u la long uba paw ha kaba la bynrap lang sa Deep Kasvankar (2/14) bad Anuj Yadav (1/14), ban pynlong ïa ka Meghalaya ba kan lap ba hap ban khylliap kloi ïa la ka jong ka pali wan tied ba nyngkong ka jong ka.
Kumta sa ar sngi dangsah kane ka jingïakhun, lada ka mariang ka ailad, kan sa pyni mano ban khur ïa ka jingjop.
