Itanagar, Naiwieng:
U Myntri Rangbah ka Arunachal Pradesh u Pema Khandu ha ka sngi U Blei, 2 tarik Naiwieng u la plie paidbah ïa ki projek pynroi kiba bun klur ha Dirang hapoh ka West Kameng District, da kaba pynskhem biang ïa ka jingangnud jong ka sorkar jong u ban roi ïa ka roi ka par kaba ïahap bad ka jingsynshar kaba shai.
Ha ryngkat ka jingsynran lang jong u Myntri ka tnat ki kam pohïing u Mama Natung bad katto katne ngut ki MLA, u Myntri Rangbah ka jylla u la aiti sha ki paidbah ïa ki saw tylli ki projek pynroi ba kongsan, ka jingkieng Double Lane Steel Composite Bridge ha Kharsa, ka Sub-Division Secretariat (ADC Office) ba dang shu shna thymmai ha Dirang, ka skul sorkar ba la pynkiew kyrdan bad ka skul Higher Chaphu Park.
Haba kren ha ka jingïalang plie, u Myntri Rangbah ka jylla u Khandu u la ban jur ba ki projek ki long ka jingpynshisha ïa ka jingthmu jong ka sorkar jylla ban pynroi ïa baroh bad ba neh, kaba la pynlong lyngba ka jingïatreilang jong u MLA ka Dirang u Phurpa Tsering bad ki nongshim bynta ha ka thaiñ.
Haba kren ha ka jingïalang, u Khandu u la kren shai ruh shaphang ka kolshor “ba ai pisa na ka bynta ka vote” kaba nangroi, khamtam hapoh kawei ka jaitbynriew, da kaba maham ba kum kine ki rukom leh ki pynduhjait ïa ka mynsiem synshar paidbah jong ka jylla. U la kyrpad ïa ki nongthep vote ban bat ïa ka jinglong hok bad ban kiar na ka jingshah pynngop ha ka bor pisa ha ka ilekshon Panchayat ban wan.
“Ki paidbah jong ka Arunachal ki dei ban kyntait ïa ka kolshor pisa bad pyndonkam ïa ka hok synshar paidbah jong ki da ka jingkitkhlieh,” la pynskhem u Khandu, da kaba kyntu ïa ki nongshong shnong ban ïada ïa ka jinglong kyntang jong ka ilekshon bad ban pynskhem ïa ki nongrim jong ka jingsynshar kaba bha.
U Myntri Rangbah ka jylla u la kdew ruh ïa ka Arunachal Pradesh Freedom of Religion Act, 1978 (APFRA), kaba pynksan ïa ka jingdonkam ban pynneh ïa ka jingïatylli, ka jingkitkhlieh, bad ka jinglong hok ha ka jingsynshar. Ka jingïalang ka la pynkut da kaba u Khandu u la pynpaw biang ïa ka jingthmu jong ka sorkar jong u na ka bynta ka “Arunachal Pradesh kaba kham khlaiñ, kaba kham ïasoh” kaba la tei halor ka jingïatylli bad ka jingkiew shaphrang.
