Kolkata, Naiwieng:
Ka kynhun nongbud jong u Myntri khynnah ka sorkar kmie uba dei khmih ïa ka tnat pule-puthi bad u President barim jong ka seng BJP ha ka jylla West Bengal u Sukanta Majumdar, kumba la pynshisha, la ong ba ka la shah thombor ha ki nongbud jong ka seng Trinamool Congress ha Nabadwip ha Nadia distrik jong ka West Bengal ha ka miet jong ka sngi Balang.
U Majumdar u la leit sha ki katto katne tylli ki prokram jong ka seng ha ka distrik Nadia kham hashwa ha kane ka sngi.
La ïathuh ba ka kali jong u, ka la shah bat hapdeng ka jingïakynad hapdeng ki nongkyrshan jong ka Trinamool Congress bad ka Bharatiya Janata Party (BJP) katba u dang wan phai na katei ka distrik, ha ka miet jong ka sngi Balang, bad ha ka jingkulmar kaba la mih hadien kata, la kynnoh ba kawei na ki kali kaba don ha ka kynhun jong u, ka la shah thombor ha ki nongïakhih jong ka seng kaba bat ïa ka jingsynshar.
U Majumdar u la kam ba katei ka jinghiar thma ïa ka kynhun nongbud jong u, ka long kaba khlem jingpynwit satia bad la leh da ki katto katne ki nongïalam bad ki nongïaleh pyrshah jong ka Trinamool Congress, ha kaba baroh ki la buaid.
U la kynnoh ruh ba katto katne ngut ki nongïakhih jong ka BJP ki la shah shoh ha ki runar ba la kyrshan da ka seng kaba bat ïa ka jingsynshar, ha kaba ki don kiba la mynsaw jur.
Ha ka por ba ai ïa kane ka kaiphod, ka kynhun jong u Majumdar ka la mih noh na katei ka jaka.Hynrei ki nongïalam ka Trinamool Congress ha katei ka thaiñ ki la kyntait ïa kitei ki jingkynnoh.
Katkum ka jingïathuh jong u Chairman ka Nabadwip Municipality ba la pynïaid da ka Trinamool Congress, u Biman Saha, ka jingïakynad ka la mih ha ka jaka ïeng bus kaba ha Nabadwip hadien ba la kynnoh ba ki nongkyrshan ka BJP ki la hiar thma ïa kawei ka ophis treikam jong ka seng trei kam jong ka Trinamool Congress, ka INTTUC.
U la kynnoh ba ha ka por ba ki nongkyrshan jong ka INTTUC ki dang ïakhih hajan ka jaka ïeng bos, ki la shah thombor biang ha ki nongkyrshan jong ka BJP ka thaiñ, kaba la wanrah ïa ka jingïakynad hapdeng kine ki ar kynhun.
Ha kine ki taïew ba ladep, ki la don bun tylli ki jingjia kiba la shah thombor ha ki kynhun jong ki nongïalam ka BJP ha West Bengal. Ha ka taïew ba la dep, ka kali jong u dkhot jong u dkhot jong ka Lok Sabha na ka seng BJP na Maldaha (Uttar) konstitwensi jong ka Malda distrik, u Khagen Murmu, ka la shah thombor ha Jalpaiguri distrik ha kaba la kynnoh ba ki dei ki nongbud jong ka seng Trinamool Congress.
U Murmu u la mynsaw jur ha kata ka jingshah thombor bad haduh mynta u dang shah sumar.
Kumjuh ruh ha u bnai Risaw, la kynnoh ba ka kynhun jong u MP ka BJP na Darjeeling, u Raju Bista, ka la shah thombor ha ki nongbud jong ka Trinamool Congress ha ki thaiñ Sukhia Pokhari jong ka Darjeeling distrik.
