Shillong, Naiwieng 07
U Sunil Chhetri u la ong ba ka jingïalehkai jong u na ka bynta ka India ka la poi sha kaba kut, hadien ba u la wanphai biang dangshen na ka bynta ka jingïalehkai ka wat ba khatduh jong ka AFC Asian Cup 2027.
U Chhetri, uba la bna paidbah kum uwei na ki rangïalehkai phutbol ba tbit tam jong ka India, u la shongthait noh na ka jingïalehkai phutbol bar ri ha u bnai Jylliew jong u snem ba la dep, hashwa ba un shah pynbor ha u coach barim u Manolo Marquez ban wanphai biang sha kane ka jingïalehkai.
Da ka jingbym lah ka India ban rung sha ka wat jingïakhun kaba kongsan, u Chhetri u la rai ba kane ka dei ka jingkut ha ka jingïaid lynti ha ka kam ïalehkai shabar ri. Nalor kata, ka lah ban long ba une u rangïalehkai ba la 42 snem ka rta un lah ban sangeh noh shi syndon na ka kam ïalehkai phutbol bad kane kan shong ha ka Bengaluru FC na ka bynta ka samoi ïalehkai ka ban wan jong ka Indian Super League (ISL).
“Lada ngi jop ïa ka ISL, kan ailad ïa nga ban phong ïa ki sopti jong ka India bad ban ïalehkai biang ha ki jingïalehkai bar ri. Ha ka rta kaba 42 snem, kam long kaba suk. Nga kwah ban thep 15 kol ha kane ka samoi bad shongthait noh,” la ong u Chhetri.
Ha ka jaka jong u Marquez la bujli noh da u Khalid Jamil kum u coach jong ka kynhun ïalehkai ka ri India ha u Nailar mynta u snem. U Chhetri u ong ba u la pyntip ha u Jamil halor ka rai jong u, da kaba kdew ba u wanphai biang tang na ka bynta ka jingïalehkai ïaknieh rung.
“Ka la long kaba suk ban ïathuh ïa u Khalid shaphang ka rai jong nga. Haba nga la rung sha ka kynhun ïalehkai ka ri, ka thong jong nga ka long tang ban ïarap katba lah ha ka jingïakhun. Lada ym don ki jingïakhun, lehse ngam shym la wan biang. Shisien ba la paw shai ba ngim lah ban rung, nga la sngewkmen ban ïathuh ha u coach halor kane ka rai,” la bynrap u Chhetri.
Ka rukom ïalehkai u Chhetri ha ka ISL ka dei ka daw ba kongsan kaba la pynbor ïa u Marquez ban wanrah biang ïa u. U la thep haduh 14 kol ha ka ISL, kaba dei ka jingkheiñ kaba ar kaba bha tam hadien u Alaaeddine Ajaraie – u nongjop ïa ka Golden Boot.
Ha kaba sdang u la artatien, u Chhetri u la mynjur, hynrei ka jingwanphai jong u kam da long kaba biang namar u la thep tang shi kol ha ki hynriew sien ïakhun. Mynta u la shongthait noh da kaba thep 95 kol ha ka jingïalehkai bar ri jong u.
