Bengaluru, Naiwieng:
Haba ki nongrep pai ki la pynjur ïa ka jingïakhih ha kylleng ka Kittur Karnataka ban dawa T.3,500 shi ton na ka bynta u pai, ka sorkar Karnataka ha ka sngi Palei ka la rai ban tuklar bad khot ïa ki ar tylli ki jingïalang ba marjan bad ki nongrep bad ki trai karkhana tylliat pai ha ka sngi Thohdieng.
Haba kam ba ka sorkar pdeng ka buh ïa ka Fair and Remunerative Price (FRP) na ka bynta u pai, u Myntri Rangbah ka jylla u Siddaramaiah u la kyntu ruh ïa ki nongrep ba kim dei ban pakhang ïa ki surok bah, kaba wanrah jingeh ïa ki briew.
“Ka jingïalang ka kynhun Myntri ka la rai ruh ban thoh sha u Myntri Rangbahduh ka ri u Narendra Modi bad ban wad por ban ïakren ïa ki jingdawa ba la buh da ki nongrep.Ngin sa buh jingeh ïa ka sorkar pdeng”, la ong u Myntri Rangbah ha ki nongthoh khubor hadien ba la wai ka jingïalang ka kynhun Myntri.
Katba ki nongrep ki dang dawa T.3,500 shi ton u kew, ki mill pat ki kyntait ban siew palat T.3,200 shi ton. U Myntri Rangbah u la ong ba u la bthah ïa ki Myntri kiba kynthup ïa u HK Patil bad u MB Patil ba kin leit ban jngoh ïa ka distrik Belagavi bad Vijayapura bad ban ïakren bad ki nongrep kiba pynlong ïa ka jingïa. “Ngi la shim khia bha ïa kane ka jingïakhih jong ki nongrep, bad ka sorkar jong ngi ka dei ka sorkar kaba kyrshan ïa ki nongrep”, la ong u Siddaramaiah.
Haba pynshai shuh shuh halor ka FRP, u Myntri Rangbah u la ong ba ka dor ba la buh da ka sorkar pdeng mynta u snem ka long T.3,550 shi ton na ka bynta ban ïoh biang 10.25% (kaba mut 10.25 kg ka shini la pynmih na 100 kg u pai). Kane ka dor kaba T. 3,550 shi ton ka kynthup ruh ïa ka jingot bad ka jingshalan. Lada ka jingmih ka long 9.5% ne duna, ka long T.3,290 shi ton, u la bynrap.
“Ka kamram jong ka sorkar jylla ka long ban thew ïa ki mar rep bad ban siew ha ka por. Ngi la sdang ïa ki lad thew Digital ha ki jaka bapher bapher,” bynrap biang u Myntri Rangbah.
Shuh shuh, u Myntri Rangbah u la ong ba ka sorkar pdeng ka don ka jingkitkhlieh ban pynbeit ïa ka Minimum Support Price (MSP) ïa ka shini, kaba long Rs 31 shi kg. “Ïa kane la pynbeit ha u snem 2019, bad ka sorkar pdeng kam shym la pynthymmai shuh naduh katei ka por”, la kynthoh u Siddaramaiah.
“Ka sorkar pdeng ka la pynbeit ruh ïa ka jingshalan shini shabar ri bad la khanglad ïa ka haduh 10 lak MT na ka bynta ka ri baroh kawei, katba tang ka Karnataka ka pynmih 41 lak MT shini,” la bynrap shuh shuh u Myntri Rangbah.
Kumjuh ruh watla ka jylla ka pynmih 270 klur litar ka umphniang ethanol, hynrei ka jingai jong ka ka long tang 47 klur litar. Ka Karnataka ka pynmih 522 lak MT u pai ha u snem 2024-25. Mynta u snem, ngi dang hap ban ïoh ïa ka jingbun, namar ba ka dang don ha ka por ot”, la ong u Myntri Rangbah.
Haba ther tyngeh ïa ki seng ka liang pyrshah ha Karnataka, u Siddaramaiah u la ong ba watla ka jingkitkhlieh ka shong ha ka sorkar pdeng hynrei ki nongïalam ka BJP ha kane ka jylla ki pynlong kam politik ïa kane ka kam bad ki ïalam bakla ïa ki nongrep.
“Ngi sngewsynei ïa ki nongrep. Donkam ban pynbeit ïa kane ka kam halor ka jingïakren. Nga kyntu ïa ki nongrep ban wan sha ka jingïalang,” u la bynrap.
U Myntri Rangbah u la ong shuh shuh ba ïa ka rukom siew ïa ki nongrep pai ha Maharashtra ruh yn ïakren ha ka sngi Thohdieng.
U nongïalam ka liang pyrshah ha Assembly u R Ashoka u la ong ba lada ka sorkar Congress ka shimkhia shisha ïa ki nongrep, ka dei ban bishar bniah ïa ka jingdawa jong ki bad ban buh ïa ka dor ba siew bai lutksan na ka bynta u pai bad ban ai ruh ïa ka jingkyrshan pisa kaba T.500 shi ton.
U Ashoka u la ong ba lada ka sorkar ka dang ïai bteng ban iehnoh ïa kane ka jingdawa jong ki, ki nongrep kin nang pynjur ïa ka jingïakhih.
