Shillong, Naiwieng 11
Ka kynhun ïalehkai kriket ka Meghalaya ka la khur ïa ka jingjop kaba ar ha ka lympung ïalehkai Men’s State A Trophy 2025-26 (Plate Group), hadien ba ka la pynliem da 1 wiket ïa ka Manipur ha ka sngi Ba-ar ha Mohali.
Haba beh ïa ka thong kaba 193 ron, ki arngut ki nongtied ba kham shadien duh, ki la lah ban kamai lut ïa ki ron kiba donkam na ka over kaba khatduh, kaba la biang pura ïa ka Meghalaya ba kan don ha ka kyrdan ba hakhlieh duh jong ka meij ïakheiñ poiñ hadien ba ka la khur 8 point, kaba ha shwa ïa kane, ki nongïalehkai ka Jylla, ki la lah ban pynliem ïa ka Sikkim.
Ha kane ka jingïakhun, ka Meghalaya hadien ba ka la jop ïa ka jingkynting pisa ka la ailad shwa ïa ka Manipur ba kan tied nyngkong ha kaba ka la kamai 192 ron na ki 49.2 over, kaba hangne u Manish Sharma (Left-arm orthodox spinner) u la lah ban lamkhmat ïa ka kynhun ban khur 3 wiket na ka bynta 18 ron na ki 10 over, bynrap pat sa u PM Santhosh uba la khur 3 wiket na ka bynta 41 ron na ki 10 over bad bynrap sa mar shi wiket ba la ïoh da u Shavian Blah, Gavineal Marpna bad u Denikcheng Marak.
Katba na ka liang ki nongtied ka Manipur, u Somokanta u la kamai 43 ron hashwa ba un shah ‘run out’ noh ha u Denikcheng.
Haba la dei ka pali ban wan beh ïa kane ka thong, ka Meghalaya ha kaba sdang kam shym la lah ban ïalehkai bha ha kaba la shah pynhap noh 3 wiket tang hapdeng ki saw tylli ki bol kata na ka 31 ron na ka bynta 1 wiket sha ka 31 ron na ka bynta 4 wiket.
Hashwa ba kiei kiei kiba kham sniew ïa ka Meghalaya, u Josiah Momin (42 na ki 62 bol, 6x4s) bad u Rohit Yadav (65 na ki 112 bol, 5x4s) ki la lah ban seng ïa ka nongrim kaba 83 ron na ka bynta ka wiket kaba saw, kaba pynlong syndon ïa ka Meghalaya ba kan lait na ka tmier ka jingma. Hadien kane, u Santosh u la kamai 32 ron na ki 55 bol, kaba la nangkham pynjan shuh shuh ïa ka kynhun ban khur ïa ka jingjop.
Hangne ruh ki wiket sa shisien ki la sdang ban khyllem biang, kaba pynlong ïa u Gulgul Sangma (7 not out na ki 13) bad Denikcheng (9 not na ki 11) ban lamkhmat ïa ka kynhun ban jam sha ka jingjop ha ka bol ba nyngkong jong ka over kaba 50.
Da kine ki artylli ki nam jop, ka Meghalaya kan khreh ban ïakhun pyrshah ïa ka Arunachal Pradesh, ka ban long ha ka sngi Palei ha Ropar.
