Shillong, Naiwieng 11
U khlur ïalehkai siat suloi ka India u Samrat Rana u la lah ban thaw khana da kaba khur ïa ka takma ksiar ha ka 10m air pistol jong ka World Championships kaba la long ha Cairo, hadien ba u la lah ban pynliem noh ïa u Hu Kai uba na China.
U Hu Kai u dei uwei na ki nongïalehkai ba kynsai ha kaba u la ïakynduh pyrshah ïa u Rana bad u la lah ban pynpaw ïa ka jingtbit. Ban ïoh rung sha ka World Championships ka long kaba eh bha ha kaba tang ki nongïalehkai kiba don ha ki kyrdan ba hakhlieh kiba lah ban ïoh rung sha kane ka lympung.
Kumba ka paw u Hu Kai u la long u nongïalehkai u bym pat shah rem ha baroh ki jingïakop SSF World Cup jong u snem 2025, nalor ka nam lahduh ha ka Asian Championships kaba la long ha Symkhen. Hynrei kaba sngwtynnad ka long ba u Rana u la tam da 0.6 poiñ hashwa ka jingïakhun kaba khatduh bad hadien u la tam biang da 10.6 ha ka jingpyrshang kaba khatduh, bad ban pynlong ïa une u rangïalehkai uba dang 20 snem ka rta ban khur syndon ïa ka takma ksiar na ka bynta ka India.
Haba kheiñ lang ïa ka jinglah ban kamai, u Rana u la ïoh 243.7, bad u Hu u la duna da 0.4 poiñ. Katba u Varun Tomar u la khur ïa ka takma rnong da kaba u la ïoh 221.7 poiñ.
Hadien kane ka jingjop, u Samrat Rana u la pynpaw ba um sngewlah ngeit bad u la kren shaphang kumno u la pynleit jingmut ha ka buit jong u ha baroh kawei ka jingïalehkai jong u.
“Ngam sngewlah ngeit. Nga tharai ba ka dei ka jaka ban ïakhun jong nga. Nga la jop ar tylli ki takma hangne ha Cairo ha ka junior world championships ha u snem 2022. Nga sngewtynnad ïa ka jinglong jingman. Nga dangpyrshang ban pynleit jingmut ha ka buit jong nga ha man la ka jingsiat hashwa ban poi sha kaba kut,” la ong u Rana.
Kumba ka long mynta ka India ka la khur haduh 9 tylli ki takma. Kine ki kynthup mar lai tylli ki takma ksiar, rupa bad rnong na ka bynta ban wan ha ka kyrdan ba-ar hadien ïa ka China.
