New Delhi, Naiwieng:
Shisngi shwa ba ka Supreme Court kan shong bishar ïa ka jingujor jong ka seng DMK kaba tuklar ïa ka rai jong ka Election Commission (EC) ban pynlong ïa ka Special Intensive Revision (SIR) jong ki thup kyrteng thep vote ha Tamil Nadu, ka AIADMK ka la mudui ïa ka jingujor ha ka ïingbishar ba hakhliehduh ban kyrshan ïa ka jingpyntreikam ba la pyntreikam da u Edappadi K Palaniswami ha ka lah sngi U Blei katba u dang kren sha ki lad pathai khubor ha Coimbatore.
Ka AIADMK ka la mudui sha ka ïingbishar ba hakhliehduh ban wad ban pyntreikam ïa ka ha ka jingkyrpad jong ka DMK kaba tuklar ïa ka SIR ha TN, ong u Palaniswami.
Ha ka jingkyrpad, ka AIADMK ka la khot ïa ka SIR kum ka jingleh kaba dei hok, kaba dei bad kaba donkam ban pynneh ïa ka jinglong khuid jong ka ilekshon bad ban ïada na ka jingleh thok jong ki nongthep vote.
“Kane ka long ban pynthikna ba ka synshar aiñ kan neh ha ka jingpynlong ilekshon”, la ong ka khubor.
Katba ka CPI(M) ruh ka la rah sha ka ïingbishar ba hakhliehduh pyrshah ïa ka SIR ha TN.
Ka ïingbishar kaba don arngut ki nongbishar ba kynthup ïa ki Justice Surya Kant bad ka Joymalya Bagchi, ka la bishar ïa kine ki jingkyrpad ha ka sngi Ba-ar. Kaba kham pawnam ka long ba ka AIADMK ka dei ka seng saiñ pyrthei kaba nyngkong eh ban leit sha ka ïingbishar ba hakhliehduh ban kyrshan ïa ka SIR.
Ka AIADMK ha ka jingkyrpad jong ka ka la pynpaw ba ka TN ka don 234 tylli ki Assembly konstitwensi, ha kaba la ïathuh ba kawei pa kawei ka jaka ka don da ki hajar tylli ki jingthoh kiba la pynkylla dur ne ki bym lah ban thep vote ha ka thup jong ki nongthep vote.
Ka AIADMK ka la pynpaw ba kum kawei na ki ar tylli ki seng saiñ pyrthei ba kongsan ha TN, kan don ha ka bynta ba pdiang lada ym pynlong hok ïa ka jingpynkylla “ha ka shithi bad ka mynsiem ba shisha jong ka” namar ka jingbteng jong ki thup nongthep vote ki bym thikna, kiba la pynkiew dor, ne kiba la pyndonkam bakla “ka ktah ha ka rukom bym ïahap ïa ki jingmih jong ka ilekshon bad ka ilekshon paidbah”.
Ka jingkyrpad jong ka AIADMK ka la ong shuh shuh ba ka jingbym pynlong ïa ka SIR kan “pynthut ïa ka bor nongmihkhmat jong ki nongthep vote”, da kaba kynnoh ba “da ki hajar ngut ki jingthoh bym dei hok ne kiba la pynkylla dur ki dang ïai bteng ban don ha ki thup nongthep vote”.
Ka la ong ba kum kine ki jingduna ki pynlong ruh ïa ka jingshah kyntait jong ki nongthep vote ba shisha, da kaba pynkheiñ ïa ka nongrim jong ka Riti synshar jong ka jinglong marryngkat ha ka jingjied.
Ka jingkyrpad jong ka CPI(M), kaba la mudui da u Secretary jong ka seng, u P Shanmugam, ka la pan ban weng noh ïa ka hukum jong ka ECI (27 tarik u Risaw, 2025), kaba la bthah ban pyndep ïa ka kam jong ka SIR hapoh shibnai. Ka jingleh jong ka EC ka long “kaba leh be-aiñ, kaba be-aiñ, bad kaba pyrshah ïa ka Riti synshar”, la ong ka jingkyrpad.
Ha Coimbatore, u Palaniswami u la ong ruh ha ki nongthoh khubor ba ki la leit sha SC ban pynsngew ïa ka jingshisha sha ki paidbah ka TN ban pyntreikam ïa ka SIR namar ba “ki nongïalam ka DMK kin thmu ban mudui bymhok ha ka ïingbishar”.
“Balei ka sorkar DMK ka tieng ban pyntreikam ïa ka SIR ha TN, bad ka DMK ka thmu ban thaw jingkulmar, kumba ka hok jong ki nongthep vote kan duh noh lada pyntreikam ïa ka SIR. Ka long kaba lah ban pynrem. La pynlong ïa ka SIR haduh 8 sien ha ka jylla, hynrei u nongïalam jong ka DMK, u M K Stalin, um shym la tieng ha katei ka por.
Ka daw ba u Stalin u tieng ïa ka SIR ka long ba ka seng kam lah ban pynrung kyrteng ïa ki vote thok namar ki daw bapher bapher, kynthup ïa ki nongthep vote kiba la dep ïap, bad dei na kata ka daw ba u ju pynphriang ïa ki jingtip lamler shaphang kane,” ong u EPS.
