Khliehriat, Naiwieng 16
Ka Shilliang Umshong SC ka la khur jingjop, katba ka Diengshynrum SC bad Chiehruphi SYWSC ki la ïasam mar shi poin ha ka wat kaba hynriew jong ka lympung ïalehkai Super Divi-sion Football Tourna-ment ba la pynïaid da ka East Jaiñtia Hills District Football Association (EJHDFA).
Ha ka jingïalehkai kaba la long ha madan artificial turf Diengshyn-rum, Khliehriat ha ka sngi Saitjaiñ, ka Shilliang Umshong SC ka la pynliem noh ïa ka Thangskai Tiger SC da 2-1 kol.
Ha kane ka jingïakhun ka Shilliang Umshong ka la lah ban ïalehkai bha naduh kaba sdang ha kaba ka ïoh ban pynkhih jar ha ka minit kaba 6 lyngba u Besterly Ksih. Une u rangïalehkai shakhmat u la pynbud biang ïa ka kol kaba ar jong u ha ka minit kaba 58 jong ka kylla miet, hashwa ba ka Thangskai Tiger kan pynphai kylla shi kol lyngba ka penalty ba la shut da u Phermedaki Syrti ha ka minit 90+4.
Haba phai sha kawei pat ka jingïalehkai kaba la long kham hashwa hapdeng ka Diengshynrum SC bad ka Chiehruphi SYWSC ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.
Lah ban kdew ba ka Sutnga SSCC ka dangbat ïa ka kyrdan kaba hakhlieh duh da kaba kamai 15 poiñ ha ki hynriew sien ïakhun, bud sa ka Rymbai Shken-shynriah kaba la ïoh 12 poiñ, ka Dieng-shynrum ka la ïoh 11 poiñ, ka Shilliang Umshong SC (10 poiñ), ka Thangskai Tiger SC (7 poiñ), ka Dhana CSC (3 poiñ), katba ka Ladrymbai B SC ka dang don ha ka kyrdan ba shatrai duh da kaba kamai tang 2 poiñ na ki hynriew sien ïakhun.
