Shillong, Naiwieng 17
Ka kynhun ïalehkai ka Sikkim ka la lah ban buh ïa ka thong kaba eh bad kaba jwat bha ïa ka Meghalaya ha ka lympung ïalehkai U-19 Men’s Cooch Behar Trophy kaba la long ha ka lah sngi U Blei ha madan ïalehkai jong ka MCA, Polo.
Ha lyndet ka jinglah ka Sikkim ban buh ïa kane ka thong ka la wan hadien ba u kapten jong ka, u Denree Lepcha u la lah ban kamai 150 ron, hadien ba ka Sikkim ka la sdang ïa ka pali jong ka na ki 46 ron bad shah pynhap 2 wiket. Kane ka kynhun ka la shah pynhap baroh ki nongtied bad ban kamai 291 ron. Te kumta ka Meghalaya ka donkam ba kan beh ïa ka thong kaba long 260 ban jop ha kane ka jingïakhun.
Tad haduh ba la kut jong ka sngi kaba ar, ka Meghalaya ka la lah ban kamai 53 ron hadien ba ka la shah pynhap noh 3 wiket bad donkam sa kumba 207 ban jop ha kane ka jingïakhun.
Haba shim kyllum ha kane ka jingïalehkai jong ka sngi kaba ar, ka Sikkim ka la lah ban ïalehkai bha ha ka pali tied jong ka bad khamtam eh u Denree Lepcha uba la lah ban kamai ïa ka 150 ron na ki 198 ki bol bad ba u la ïoh ruh ka jingkyrshan na u Sahil uba la lah ban kamai 51 ron na ki 164 bol bad kine baroh arngut ki la lah ban seng ïa ka nongrim jong ka jingkamai ron paralok kaba 105 ron na ka bynta ka wiket kaba saw.
Na ka liang ki nong kawang bol ka Meghalaya, u Mewankitbok Kharpuri u la ïoh ban khur 3 wiket na ka bynta 48 ron na ki 19 over bad haba kheiñ kyllum tang ha kane ka jingïakhun u la ïoh ban khur 8 wiket na ka bynta 65 ron, bud pat sa u Rudra Singh Rathor (2/44), Paisal Ali (1/13) bad u Gaurav Narleng (2/22).
Kane ka jinglah ban buh ïa ka thong, ka la ai mynsiem ïa ki rangïalehkai ka Sikkim ba kin nangïai bteng ban ïalehkai bha ha kane ka jingïakhun.
Ki lai tylli ki wiket kiba ka Meghalaya ka la duh noh ha ka jingwan beh ïa ka pali jong ka ki long u Ruda uba la lah ban kamai tang 2 ron, u Bishesh Chettry ba la kamai 21 ron, bad u Dipayan Nand 19 ron.
Kumta ka sngi kaba lai kan dei ka sngi ba kongsan bha ïa ki nongtied ba dangsah ka Meghalaya ban bteng ïa la ka pali jong ki na ka bynta ban beh ïa kane ka thong.
