Imphal, Naiwieng:
Ha ka jingïatreilang ha kylleng ka Manipur, ki bor pahara ha ka sngi U Blei, 16 tarik u Naiwieng, ki la kem ïa lai ngut ki riew kiengatiar kiba dei na ki kynhun lehnoh bapher bapher, ryngkat bad ka jinglap ïa ka jaka buh tiar bad ki kuli kiba bun bha.
Ha ka jingkhynra kaba nyngkong, ki bor pahara ki la kem ïa u Khuraijam Shyam Singh uba la tip kyrteng kum u Mangal (37) na ka ïing sah jong u ha Lairensajik Mamang Leikai, Imphal West. Ki bor synshar ki la ong ba u la donkti ha ka kam dawa pisa ha ka thaiñ bad ha ka jingpyntreikam beaiñ bad tuklar ïa ki mukotduma kiba ïadei bad ki kam runar pyrshah ïa ki kynthei. Kawei ka mobile la kurup na ka kti jong u.
Ha ka jingkhynra kaba kyrpang, ki shipai ki la ïoh ban kem ïa u Nongmaithem Bidyasagar Singh uba la tip ruh da ka kyrteng kum u Kapchaoba (24) na Khumbong Awang Leikai kaba hap hapoh jong ka Patsoi Police Station, Imphal West. La kynnoh ba u ju dawa pisa bad byrngem ïa ki nongñiah trok ha ka surok Jiribam-Imphal, bunsien u ju knieh ïa ki shabi bad ki kot ki sla jong ki. La ïoh kurup ïa kawei ka mobile phone bad kawei ka Card Aadhaar na u.
Ha ka jingkem kaba kham paw ha katei ka sngi, ka kynhun ba ïatreilang jong ki pulit ka Manipur, CRPF, bad Assam Rifles ki la kem ïa uwei u Major jong ka RPF/PLA uba la khot ïalade, u Koijam Ibochouba ïa uba la tip ruh da ka kyrteng kum u Inao/Sumo/Somo/Pansareng (45), na kawei ka ïing ba la ai wai ha Sagolband Nepra Menjor Leikai kaba hap hapoh ka jingkhmih jong ka Imphal Police Station.
Utei u dei u lehnoh ba shah thwet ha kaba ïadei bad ka jingshah thombor ha u snem 2017 ha ki shipai 4 Assam Rifles unit ha Sajik Tampak.
Da kaba pynshong nongrim halor kane ka jingpynpaw pyrthei jong u, ki bor pahara ki la ïoh kurup shibun bah ki tiar ïaleh, ki kuli, ki tiar pynbthei, bad ki jaka buh thma, kiba la tep hapoh ka drum plastik ha kawei ka jaka rep ha Kharungpat, Kakching district.
Ki tiar kiba la ïoh ban kurup ki kynthup, kawei ka suloi M-16, 8 tylli ki suloi SLR, kawei ka .303 LMG, ar tylli ki suloi .303, 190 tylli ki kuli Amogh carbine, 30 tylli ki kuli SLR, kawei ka Detonator, 32 tylli ki Magazine SLR, saw tylli ki Magazine 7.62, lai tylli ki Magazine LMG30. Ki Magazine LMG, lai tylli ki Magazine M-16, saw tylli ki Magazine INSAS, lai tylli ki Bom 2 Inch, Ar tylli ki IED, kawei ka Remote Device, Ar tylli ki Electric Circuit, kawei ka Spirit Drum, kawei ka Mobile Phone kaba don ka Sim Card.
