Mexico City, Naiwieng:
Da ki hajar ngut ki la mih paidbah ban iakhih ha Mexico ha ka Sngi Saitjaiñ ryngkat ka jingthoh ‘Generation Z’, ban pynpaw ia ka jingpyrshah jur halor ka jingshah pyniap jong u heh ka tnat ba dei khmih ia ki kam runar ha ki khyndiat taïew ba la dep.
Kumta, la ong ba ha katei ka nongbah Mexico, ki la mih ki katto- katne ki kynhun jong ki paidbah nongiakhih, ki la ialeh pyrshah ia ki nong-ap pahara jong ka National Palace, ha kaba ka President Claudia Sheinbaum ka shong- ka sah bad la ong ba kane ka jingiakhih jong kitei ki paidbah, ka la wanrah ruh ia ka jingiakynad bad ki pulit kiba ap pahara ia katei ka jaka. U Secretary ka tnat ïada jong ka Mexico, U Pablo Vazquez, u iathuh ha ka jingialang bad ki nongthohkhubor, ba ki don 100 ngut ki pulit ophisar, kiba la mynsaw, ba kynthup ia 40 ngut kiba donkam ban dang shah sumar hapoh Hospital. Kumjuh ruh pat la iathuh ba ki don kumba 20 ngut ki riew paidbah kiba la mynsaw ha katei ka jingiakynad kaba la mih ha katei ka sngi ba don ka jingiakhih paidbah jongki.
U Secretary jong ka tnat pahara paidbah u la ong ruh ba 20 ngut ki briew ki la shah kem bad sa 20 pat ki dei kiba la pyllait noh.
Kiwei pat ki jingïaid paidbah ki la long ha ki nongbah bapher- bapher ha kylleng jong ka Mexico, kynthup ruh ha ka nongbah Michoacan, kaba don sha ka phang Sepngi jong katei ka ri, ha kaba ka la mih ka jingbitar halor ka jingshah pynïap jong u Mayor ka Uruapan, u Carlos Manzo, ha ka 1 tarik u Naiwieng, uba la shah siat ïap ha ka jingïalang paidbah ha katei ka sngi. Katto katne ngut ki nongïakhih ha Mexico City ki la pynpaw ïa ka jingbitar jongki pyrshah ïa ka seng jong u Sheinbaum, da kaba pyrta “Mih noh, Morena.” Don ruh kiba la khot ia ka jingpyrshang ba ratbah ban khanglad ia ki kam runar bad ki kam thombor, da kaba pyrta, “U Carlos um shym la dei ban ïap, hynrei dei ka sorkar kaba la pynïap ïa u.”
Ka kynhun kaba khot ïalade ka “Generation Z Mexico” kaba la khot ïa ki jingïakhih ka la ong ha ka “manifesto” kaba la saphriang ha ki rynsan ‘social media’ ba ka dei ka kynhun kaba khlem liang bad ka mihkhmat ïa ki samla Mexico kiba la thait na ka jingshah thombor, ka jingbamsap bad ka jingpyndonkam bakla ïa ka bor.
