Shillong, Naiwieng 17
U General Secretary ka Meghalaya Sport Climbing and Mountaineering Association (MeSCMA) bad uba long ruh u nongkiew lum ka Jylla, u Bah Wallambok Lyngdoh u la shah jied ban long kum u dkhot hapoh ka council (Governing Council) jong ka Indian Mountaineering Foundation (IMF).
Kane ka la wan hadien ka jingïalang jong ka Annual General Body Meeting kaba la long ha ka 14 tarik mynta u bnai ha IMF Campus, New Delhi.
Ka IMF ka dei ka kynhun ba hakhlieh duh kaba don ïa ka jingkitkhlieh ban pynïaid ïa ki prokram kiewlum bad ki kam ïalehkai ba ïadei hapoh ka ri. Ka treikam kum ka nongpynïaid hapoh ka jingkhmih da ka tnat ïalehkai jong ka Sorkar Pdeng na ka bynta ki prokram ïalehkai hapoh ka ri bad wat shabar ri ruh kumjuh, kynthup ïa ki jingïalehkai kiba paw kum ki jingïalehkai Asian Games bad ka Olympics. Ka IMF ka dei ruh ka synjuk kaba la pynïasoh sha ka International Federation of Sport Climbing (IFSC).
Katei ka council ka kynthup ïa ki dkhot kiba ju trei shitom kum ki nongïalam, ban thaw bad ban pyntreikam ïa ki polisi na ka bynta ban kyntiew bad pynroi ïa ki jingïalehkai kiew lum kynthup ïa ka Sport Climbing ha kylleng jong ka ri.
Ïa ka jingjied na ka bynta katei ka kyrdan kaba don haduh 16 ngut ki nongkieng lum kiba paw na ka kynhun treikam jong ki dkhot jong ka IMF. Napdeng kine, 11 ngut la jied lyngba ka jingthep vote. Ka kam kum ki dkot ka council ka long ban shakri ar snem ryngkat u President ba la dep shah jied thymmai u Col. Vijay Singh, VSM (ba la shongthait).
Te kumta ka MeSCMA ka ïeng ha ka nongrim ban ïoh shibun ki jingmyntoi lyngba u Bah Lyngdoh uba long u nongmihkhmat sha ka IMF. Ka jingdon jong u hapoh katei ka synjuk kan long ka jingïarap ban kyntiew ïa ka jingïalehkai kiew lum ha ka Jylla bad ha kylleng jong ka ri.
Ki dkhot jong ka Governing Council (GC) na ka bynta ka samoi treikam 2025-2027 ki long u Prem Singh (Retired IG, ITBP), Debraj Dutta (Kolkata), Wallambok Lyngdoh (Meghalaya), Col. Anand Swaroop (Retired), Harbhajan Singh (Retired IG, ITBP), M.R. Vijayragha-van (Karnataka), K. Saraswati (Maharashtra), Yambem Laba (Manipur), Debabrata Mukherjee (Kolkata), Keerthi Pais (Karnataka) bad u Group Captain R.C. Tripathi, VM (G) (Retired).
