Shillong, Naiwieng 18
Ka Meghalaya ka la pynliem noh ïa ka Sikkim da 2 wiket ha ka lympung ïalehkai Cooch Behar Trophy 2025-26 (plate group) ha ka sngi Ba-ar ha madan ïalehkai jong ka MCA ha Polo.
Ha lyndet kane ka jingjop jong ka Meghalaya ka la wan hadien ba u Narleng (128) bad u Angkit Tamang (35 not out) kiba la lamkhmat ïa ka kynhun ban kynjoh sha ka thong, ha kaba ïa ka ron kaba ka Meghalaya kan pyntikna ïa ka jingjop ha kane ka jingïakhun ka la wan na u nongtied ba 10 u Apandanka Marak, kaba u la lah ban jam shabar na u tyllai (boundary). Te kumta mar sien ïohi ba ka bol ka la tam shabar jong u tyllai, baroh kawei ka kynhun ïalehkai ka Jylla, ki la mareh beit beit shapdeng ka madan ban ïashad ïakmen ha ryngkat ka jingrisa bad kynhoi halor kane ka jingjop.
Kumban shu pynkynmaw, ka Meghalaya ka donkam 260 ron ban jop ha kane ka jingïakhun, bad ba ka la wan ban sdang ïa la ka pali jong ka hadien ba ka la lap ba kamai lypa 53 ron bad hap noh 3 wiket, hynrei da ka mynsiem ïakhun kaba tyngeh, ka la lah ban kot ïa kane ka thong hadien ba ka la hap noh 8 wiket.
Ha ka sngi kaba sdang ka Sikkim ha ka pali wan tied ba nyngkong jong ka, ka la lah ban kamai tang 76 ron bad hadien kane, ka Meghalaya pat ka la lah ba kan kamai 108 ron, ha ka pali wan tied kaba ar (second innings), ka Sikkim ka la ïalehkai kham bha bad kamai haduh 291 ron.
Ka dawbah jong kane ka jingjop jong ka Meghalaya ka la wan na ka ka jingseng ïa ka nongrim kamai ron paralok na ka bynta ka wiket ba 6 hadpeng u Gaurav bad u Angkit, kiba la lah ban seng ïa ka nongrim ban kynjoh shaduh 136 ron.
Ha kane ka jingïakhun ka Sikkim kam shym la treh ban pyndonkam da ka bol ba thymmai, ïa kaba ka la ïai bteng ban pyndonkam da ka bol barim, kum shi bynta ban ailad ïa ki nongkawang bol ba kin lah ban leh eiei, hynrei kane ka buit ba la pyndonkam ka Sikkim, kam shym la tehlakam ïa ki nongtied ka Meghalaya ban kamai ïa ka ron kaba ki donkam ba kin jop ha kane ka jingïakhun.
Haba ïadei bad kane ka jingjop, u President ka MCA u Naba Bhatacharjee, u la ong ba kane ka jingjop ka long ka jingpynkyndit, kaba kren shai ïa ka mynsiem ïakhun da baroh ki khynnah, kaba khlem pep kan ai mynsiem ïa ka jingïalehkai ha kane ka Jylla.
Lyngba kane ka jingjop, ka Meghalaya kan mih na la ïing ban leit pat sha Anand, Gujarat kum shi bynta ka jingpynkhreh na ka bynta ban ïakhun pyrshah ïa ka Manipur, ka ban sdang naduh ka 23 tarik mynta u bnai.
