Shillong, Naiwieng 18
Ka PFR Football Academy, ka la long ka shlem ai jinghikai kaba nyngkong eh na ka Jylla bad kumjuh na ka nongbah Shillong, ba kan leit shim bynta ha ka 18th U-11 bad U-13 Bangkok International Super Cup kaba la thmu ban sdang naduh 3 haduh 8 tarik u Nohprah mynta u snem ha National Training Centre, Nong Chok kaba ha Bangkok, Thailand.
Nalor kane ka lympung, kitei ki kynhun kin leit shim bynta ha ka prokram ai jinghikai ba kyrpang kaba shisngi na u Coach UEFA-Licensed (European) ha ka 5 tarik. Kane ka jingïalehkai ka ai rynsan na ka bynta ki khynnah ïalehkai U-11 bad U-13 jong ka PFR Football Academy ban ïoh ïa ka jingshemphang kaba kordor ha ka kam ïalehkai.
Ha kane ka Bangkok Interna-tional Super Cup yn wan shim bynta da ki kynhun na ki klob bad ki shlem ai jinghikai kiba na Thailand, India, Japan, Philippines, Hong Kong, Taiwan, Indonesia bad na Singapore.
Da kane ka jingïashim bynta, ka PFR Football Academy ka la long kawei na ki shlem ai jinghikai ba nyngkong eh na ka Jylla khamtam na Shillong ban ïashim bynta ha ka International Grassroots shabar ri.
U Secretary ka PFR FA u la pynpaw ba kane ka jingshah khot sngewbha na ka iPlay Sports Co. Ltd. ka dei lyngba ka Prithivi Sports and Events (PES), kaba la ithuh ïa ka jingtrei shitom ka PFR Football Academy bad kaba ailad ïa ki khynnah ba kin ïashim bynta ha ki lympung ïalehkai.
“Ngi la kylli ïa ki coach shaphang ka jingsngew jong ki halor ka jingshim bynta ha kane ka jingïalehkai shabar ri. Ka Kong Nylla Meri Wahlang (Head Coach) bad u Bah Jewelson Lyngdoh, Assistant Coach, ki la pynpaw ïa ka jingkmen halor ka rai jong ki bor ba dei khmih ban ïashim bynta ha kum kane ka lympung namar ka ailad ïa ki coach ban ïoh jinghikai na kum kine kiba nabar ri na ka bynta ban kyntiew ïa ka jingshemphang jong ka kynhun ïalehkai jong ngi.”
Shuh shuh kane ka lympung ka plie lad ïa ki khynnah kiba dang ha ka rta kaba 10 haduh 12 ba kin pyni ïa ki sap ïalehkai ba kyrpang jong ki bad ruh ban ïoh ïa ki jinghikai ki ban saiñ dur na ka bynta ka lawei jong ki.
Ha kaba ïadei bad ka kynhun bad ka jingpynkhreh, ki la bynrap, “Ngi la pynkhreh bha na ka bynta kane ka lympung. Baroh ki khynnah ïalehkai ha ka kynhun ki dei kiba la tbit, kiba la ïalehkai ha ki lympung ïalehkai bapher bapher ha ka Jylla bad shabar. Lyngba ka jingpynkhreh kan long ka jingïarap ïa ka kynhun ba kan nangjam shaphrang bad ngi kyrmen ba ngin ïakhun tyngeh na ka bynta ban khur ïa ka jingjop.”
Ha kawei pat ka liang ka coach ka Nylla Meri Wahlang ka la pynpaw ka jingai khublei ïa ki bor ba dei khmih jong ka PFR Football Academy kiba la trei shitom na ka bynta ka jingbit jingbiang jong ki khynnah ïalehkai. Ka la ai khublei ruh ïa ka jingtrei shitom u Bah Rilang Mylliempdah bad Bah Franky Kharumnuid, kiba long ki nongseng ïa kane ka shlem ai jinghikai, kiba la plie lad na ka bynta ki nongïalehkai ba shim bynta ha kane ka lympung ïalehkai bar ri.
Ki kyrteng ki khynnah ïalehkai U-11 ki long u Mewanbanshan Khyriem (GK), Bakhamkynjai Kur-kalang, Rodonald Jana, Mehinang -ker Nongrum,Rizwan Khan, Ksan-bok Syiemlieh, Brayden Thawmuit, Daniel Suting, Mebhabok Tariang, Alneson Baino, Neil Ryan Kharbhih bad u Confixly Nongbri.
Ki kyrteng ki khynnah ïalehkai U-13 ki long u Graham A Nongkynrih (GK), Manlongkhraw Wahlang, Aronzorian L Peinlang, Unsan Tista Warkhyllew, Jazen Aiden L Mawphlang, C. Pyngrope, Damewanshwa Baino, O Wandon-dor Kharir, Nathaniel Kharkongor, Damebandon Mawkhroh, Kitdor Kynsai Kharbudnah bad u Haban Blah.
