Shillong, Naiwieng 18
Hadien ka jinglah ban khur ïa baroh san tylli ki nam jop, ka Meghalaya ka la long kiba la pynkhreh ban mih madan na ka bynta ban ïa aireng pyrshah ïa ka Mizoram ha ka lympung ïalehkai U-23 Men’s State A Trophy, ka ban long mynta ka sngi Balang ha Mohali.
Kane kan dei ka sien jam ba nyngkong ba napdeng baroh ki kynhun ka Jylla, dei tang kane kawei ka kynhun kaba la lah ban jam shaduh ka phainal, ha kaba ka la ïoh ruh ka jingkitbok kitrwiang na u President bad u Secretary jong ka MCA u Nababrata Bhattacharjee bad u Bah Raynold Kharkamni.
Ka lynti ïaid kane kynhun ïalehkai ka Meghalaya ha kane ka lympung ka long ba ka la sdang shwa ban khur ïa ka jingjop kaba 93 ron pyrshah ïa ka Sikkim bad bynrap sa ka jingjop da 1 wiket pyrshah ïa ka Manipur, ka la pynliem ruh ïa ka Arunachal Pradesh bad ïa ka Nagaland da 8 wiket bad kaba kut da ka jingjop kaba 23 ron pyrshah ïa ka Mizoram, kaba la biang pura syndon ïa kane ka kynhun ba kan bat ruh ïa ka kyrdan ba hakhlieh duh na kane ka thup (group).
Napdeng ki nongïalehkai u Dipankar Baruah, u la lah ban kamai 203 ron, bad dei tang ma u ban lah ruh ban kamai ïa ka spah ron (century) ha kane ka samoi ïalehkai jong kane ka lympung, na ka jingïakhun kaba la dep pyrshah ïa ka Mizoram.
Naka liang ki nongkawangbol, ka Meghalaya ka don 5 ngut bad kine ki kynthup ïa u Manish Sharma, Gavineal Marpna bad Shavian Blah bad kine baroh ki la ïoh ban khur mar 8 wiket ha kane ka lympung.
