Shillong, Naiwieng 19
Ar ngut ki khynnah ïalehkai Judo napoh ka shlem ai jinghikai jong ka SAI, Training Centre, Shillong ki la wanrah burom ïa ka Jylla da kaba khur takma ha ka Sub-Junior National Judo Championships 2025 kaba la long ha Hyderabad.
Kine ki long u Adric Lyngdoh Nonglait na East Khasi Hills uba la khur ïa ka takma rupa ha ka kyrdan ïalehkai jong kiba hapoh 66kg, katba ka Larika Kharkylliang na Eastern West Khasi Hills kaba la khur ïa ka takma rnong ha ka kyrdan ïalehkai jong kiba hapoh 48kg.
Ïa kane ka lympung la pynlong da ka Judo Federation of India ha ryngkat ka Telangana Judo Association kaba la sdang naduh 16 tarik bad kan kut ha ka 20 tarik mynta u bnai.
Na ka liang ka Megha -laya Judo Association (MJA) ka la phah phra ngut ki khynnah sha katei ka lympung bad u coach jong ka SAI u Jonathan Larinsanga u la long ha kajuh ka por kum u Coach-cum-Manager ïa kane ka kynhun.
“Ngi sngewkmen ba ki ar ngut ki khynnah ïalehkai kata u Adric Lyngdoh bad ka Larika Kharkylliang ki la lah ban wanrah burom ïa ka Jylla da kaba khur takma,” la ong ka kyrwoh ba la pyllait da u General Secretary ka MJU u Dipak Mallick.
La ong ruh ba ka jingjied ïa kitei ki khynnah ka long ruh kat kum ka jinglah ban ïalehkai bha ha ka Meghalaya State Judo Championship kaba la long ha u Risaw mynta u snem ha kane ka nongbah.
Lah ban kdew ba kane ka long ha ka sien kaba nyngkong ba ka Jylla ka la lah biang ban khur takma mynta u snem namar hadien la bun snem kam shym la ïoh shuh ban khur takma ha ki lympung ïalehkai shabar Jylla (national level).
Kiwei pat ki nongïaleh -kai kiba na ka shlem ai jinghikai jong ka SAI ki long u Hameki Dhar (50kg) na West Jaiñtia Hills bad u Laitluit Kharkhylliang (55kg) na Eastern West Khasi Hills. Katba kiwei pat ki khynnah ki long ka Angela Jasaiñ (40kg) na East Khasi Hills, u Tiraj Phawa (30kg) na East Jaiñtia Hills, Bansham-phang Wahlang (40kg) na Eastern West Khasi Hills bad u Chegado B. Marak (45kg) na South Garo Hills. Kine baroh hynriew ngut kim shym la lah ban kynjoh sha ka thong ha katei ka lympung.
Te kumta katei ka synjuk kam lah khlem da ai khublei ïa kitei ki ar ngut ki khynnah kiba la lah ban khur takma bad kyrmen ba kin nangïai kiew shaphrang ha kiwei pat ki lympung ïalehkai ki ban wan. Shuh shuh ka synjuk ka la ai khublei ruh ïa ki coach, ki nongai jinghikai lem bad baroh kiba la don bynta lang na ka bynta ban pynbit pynbiang ïa kane ka kynhun hashwa ba kan mih ban leit sha Hyderabad.
