Shillong, Naiwieng 19
Ka kynhun ïalehkai ka Meghalaya ka la lah ban pynliem syndon ïa ka Mizoram da 136 ron, na ka bynta ban rah ïa ka nam kum ka lahduh ka lympung ïalehkai jong ka BCCI’s State A Trophy 2025-26 (plate group) ha ka sngi Balang ha Mohali.
Kane ka kynhun ïalehkai U-23 ka Jylla, ka la ïuhkjat ha kane ka lympung, ryngkat bad ka jinglah jong ka ba kan khur lynter ïa ki nam jop da kaba ka la jop shwa ïa ki san tylli ki jingïakhun ba shakhmat bad bynrap lang pat ïa ka phainal, kan pynlong ïa kane ka kynhun ban jam sha ka kyrdan ïakhun jong ka ‘elite group’ na ka bynta ka samoi ïalehkai ka ban wan.
Haba phai sha kane ka jingïakhun, ka Meghalaya hadien ba ka la jop ïa ka jingkynting pisa ka la kam trai ban tied nyngkong ha kaba ka la kamai haduh 307 ron hadien ba ka la shah pynhap noh 7 wiket na ki 50 over.
Ka nam tam napdeng ki nongtied dei u Pushkar Raj Singh uba la lah ban kamai 105 ron bad ban ïai neh haduh kaba kut, bynrap lang da ka 51 ron ba la kamai da u Dipankar Baruah bad ryngkat u Shavian Blah (74 ron na ki 54 tylli ki bol), kine baroh arngut ki la seng ïa ka nongrim kamai ron paralok kaba 104 ron na ka bynta ka wiket kaba ar, ïa kaba la nangseng nongrim shuh shuh da ka jingkamai ron paralok na ka bynta ka wiket kaba lai hapdeng u Dipankar bad u Pushkar, kiba la lah ban ïa kamai 81 ron, kaba pynlong ïa ka Meghalaya ba kan buh ïa ka thong kaba eh bad ba jwat bha ïa ka kynhun ïalehkai ka Mizoram.
Haba la wan ban beh ïa kane ka thong, ka Mizoram, ka la hap ban ïaid ïa kiba bun ki jingeh tad haduh ba kan da pyndem ïalade hadien ba ka la kamai tang 171 ron bad hap lut baroh ki wiket ki jong ka ha ka over kaba 43.
Ha kaba sdang eh jong ka jingïakhun, ka Mizo-ram ka la kamai 115 ron hadien ba ka la hap noh 2 wiket ha ka over ba 25, hynrei kynsan saw tylli ki wiket ki la hap noh, kaba pynlong ïa ki ban kamai tang 126 ron bad hap noh 6 wiket, kaba hangne, ka jingdonkam ban kamai ïa ki ron ba dang sah, ka ïai kiew na kawei ka over sha kawei pat, ha kaba u nongtied uba la ïeng ban ïakhun dei tang u Tetea uba la lah ban kamai 41 ron, hynrei ka Mizoram ka la hap baroh ki 4 wiket kiba dangsah jong ka hadien ba kan kamai tang 6 ron.
Kane ka jinglah ban pynhap kloi ïa ki wiket ka Mizoram, ka jia long ba ka Meghalaya ka la pyndonkam lang ïa ki nongkawang bol (pace bad spin), ha kaba u Manish Sharma u la khur 3/30, Shavian 3/51. Pushkar 2/13 bad Gavineal Marpna 2/22.
Ha kaba kut artad kane ka lympung u Dipankar, uba dang shu kyntiew sha kane ka kyrdan ïakhun, u kylla long u nongtied uba ar ha kane ka lympung ban kamai haduh 254 ron na ki 6 tylli ki pali (innings) ba u la ïakhun, bad ha ka liang ka nongkawang bol u Manish bad u Shavian ki la ïoh ban ïa khur mar 11 tylli ki wiket, katba u Gavineal u la ïoh 10 tylli ki wiket.
Ïa kane ka kynhun ïalehkai ka Meghalaya la ïalam kum u coach da u Neetesh Sharma bad u Shiva R Sangma kum u Assistant Coach bad ba la bynrap da ka jingïadon bynta lang jong Emidao Dhar (physio), Skhembor Khongbtep (trainer) bad Wonderful E Pakynteiñ (manager).
Halor kane ka jingjop, u President bad u Secretary ka MCA u Naba Bhatacharjee bad Bah Raynold Kharkamni ki la ai ïa ka kyntien ïaroh bad pyrto ïa kane ka kynhun ban jop ïa ka nam lahduh ha kane ka lympung.
