Khliehriat, Naiwieng 20
Ka Sutnga SSCC ka la ïaibteng ban ban bat ïa ka kyrdan ba hakhlieh ha ka lympung ïalehkai Super Division Football Tournament ba la pynïaid da ka East Jaintia Hills District Football Association (EJHDFA), katba ka Diengshynrum ka la wan ba-ar.
Ha ka jingïalehkai kaba la long ha madan artificial turf Diengshynrum, Khliehriat ha ka sngi Balang, ka Diengshynrum SC ka la pynliem noh ïa ka Thangskai Tiger SC da 1-0 kol bad ïa kane la thep da u Rumi Lyngdoh ha ka minit 60.
Ha kawei pat ka jingïalehkai kaba bud, ka Sutnga SSCC ka la jop da 1-0 kol ïa ka Rymbai Shkenshynriah SC. Kane ka la wan urlong lyngba u Sauni Phawa, uba la thep ha ka minit kaba 85.
Ha kaba kut jong ki hynñiew sien ïakhun, ka Sutnga SSCC ka la kamai 18 poiñ na ka bynta ban lamkhmat ha kane ka lympung, ka Diengshynrum SC kaba la wan ba-ar ka la kamai 14 poiñ, ka Shilliang Umshong SC ka la kiew haka kyrdan balai ka la kamai 13 poiñ, katba ka Rymbai Shkenshynriah SC ha ka kyrdan ba saw bad 12 poiñ.
Ka Thangskai Tiger SC bad Chiehruphi SYWSC ki la ïoh mar 7 poiñ, katba ka Dhana CSC (6 poiñ) bad ka Ladrymbai-B SC (2 poiñ) na ka bynta ban wan ha ki kyrdan ba shatrai.
