Itanagar, Naiwieng:
Ka Model Code of Conduct (MCC) ka la treikam ha baroh kawei ka jylla Arunachal Pradesh da ka jingpynbna ïa ka ilekshon sha ki Municipal Ward kiba hap hapoh ka Itanagar Municipal Corporation (IMC) bad ki jaka treikam jong ka Panchayati Raj. Kane ka MCC ka la treikam naduh ka 18 tarik, Naiwieng, haduh ka 15 tarik, Nohprah.
Ka Ophis jong u Deputy Commissioner-cum-District Municipal Election Officer, Capital Itanagar, ka la pynmih ïa ka hukum kaba thikna kaba la buh ïa ki kyndon kiba pyrkhing ïa ki seng saiñ pyrthei bad ki kyrtong ban pynthikna ïa ka jingïaid beit ka ilekshon bad ban pynlong kaba laitluid.
Katkum katei ka hukum, baroh ki seng saiñ pyrthei bad ki kyrtong ki dei ban kiar na ki kam kiba lah ban pynmih ïa ka jingïakynad ha ka imlang-sahlang, ban pynthut ïa ka suk ka saiñ ki paidbah ne ban pynkheiñ ïa ki kyndon ba ïadei bad ka ilekshon. La khang ban pyndonkam ïa ki jaka mane blei na ka bynta ki jingïalap paidbah.
Ki kyndon ki khang ban pyndonkam da ki kor pynsawa khlem ka jingbit kaba biang, ban sam kyiad sawphew phra kynta shwa ban pynlong ïa ka jingthep vote, bad kino kino ki rukom pynlong ilekshon hajan ki hospital bad ki jaka pule. Ka hukum ka khang ruh ïa ka jingpynmih ïa ki jingthoh lamler, ka jingpyndonkam ïa ki tiar ïalap ilekshon kiba pynjah burom, bad kano kano ka jingpyrshang ban ai pisa ne pynngop ïa ki nongthep vote, kynthup lyngba ka jingpynïap ïa ki mrad kum ki sniang ne ki jingsam kum ka doh.
Ka bor synshar ka la buh ruh ïa ki jingkitkhlieh kiba shai halor ki nongpynïaid ïa ki jingïalang bad ki jingïaid paidbah, da kaba bthah ban ïoh jingbit shwa na ki bor synshar shnong, ban bud ryntih ïa ki kyndon pynïaid kali bad ban ïatreilang bad ki pulit bad ki Majistor. Ha ka sngi thep vote, ki slip pynshisha ba la ai sha ki nongthep vote ki dei ban long ha ka kot kaba sada khlem kano kano ka dak jong ka seng ne ka kyrteng jong u kyrtong, bad la khang pyrshah ïa ki kyrtong ban ai jingbam ne ban pynlong ïa ka jingïalum paidbah hajan ki jaka thep vote.
Katba ka Election Commission jong ka jylla ka la buh ïa ka jingpynlut pisa na ka bynta ki kyrtong kiba ïakhun. Na ka bynta ki dkhot jong ka Zilla Parishad (ZPM), ka jingpynlut kaba heh tam kaba lah ban shah ka long T.3 lak, katba ki kyrtong kiba ïakhun ïa ki dkhot jong ka Gram Panchayat (GPM) ki lah ban pynlut haduh T.50,000. Ki bor pynïaid ki la kyntu ïa baroh ki kyrtong ba kin bud ryntih ïa kine ki kyndon ban pynneh ïa ka jinglong hok jong ka rukom jied nongmihkhmat.
Da ka jingpyntreikam ïa ka MCC bad ki jingbthah kiba shai kiba la ai sha ki bor jong ka aiñ bad ki bor ba dei khmih ha ka ilekshon, ki mashin jong ka jylla ki la sdang ïa ki jingpynkhreh ban pynthikna ba kan ïaid beit ïaid ryntih ïa ka ilekshon Panchayat bad Municipal ban wan ha Arunachal Pradesh.
